اخرك بلوك

كان زمان في عشم و موده و محبه كان في عتاب كنت بحبك فبعذرك واسمعك واسمحلك تحكي وتقول وتعيد وفي الاخر نصفي لبعض .
كان الاخ اخ بجد وسند لاخواته صبيان وبنات، وطبلية تلم الأحباب وكان مهما كانت الاحوال صعبه بس بنحب بعض ومن غير منافس.
وكانت الزيارة الاسريه جميله ومريحه فيها فضفضه ومحبه، فيها كلام ستات من هنا ومن هناك وبنات وحكايات وشباب وروايات.
وكان احلي حاجه لمه العيله اللي بعد التطور بقت سؤال بالتليفون وبعدها .. علي مر الزمان والايام بقت العلاقات كل شويه بتبقي فاتره اكتر، بقت الاسره بتبعد عن العيله وافراد الاسره بقت بتبعد عن بعضها.
واستبدلنا اهلنا واحبابنا بالعالم الافتراضي عالم التنافر الاجتماعي ( مواقع التواصل الاجتماعي ) الفيس بوك وتويتر، بقي لينا فيها اصحاب واحباب نسجتها لينا احرف "الكيبورد" في منهم بجد ومنهم وهم اللي فعلا زي حقيقتهم حق ومنهم اللي بيرسموا اللي حبين يظهروا .. وعلاقتك باللى من دمك بقت تنتهي ببلوك او الغاء صداقه وعلاقاتك بصحابك اللي بينك وبينهم عشره بخلاف بسيط وتنتهي العلاقه واخرك معايا بلوك.
نظره رضا لاهلك ابعد عن العالم افتراضي، وارجع للناس اللي بجد برغم ان جدعنتهم بقيت اقل بس دعواتهم وخوفهم ودعمهم مادي ملموس مش حروف علي شاشه .. مفكرتش كده تقفل عالمك الخارجي وترجع تاني لعالمك الداخلي تجرب تقرب وترجع تلمس اقرب الناس ليك ..
حاول مش هتخسر حاجه ده العلاقات اخرها بلوك.