الرجل "النحنوح"

انا اسمى "ندى" وأول مرة اكتب مقال ، وقررت انه يكون بـ "العامية" ، علشان انا مش بحب "الفزلكة" فى الكلام، وقررت انى لما اكتب يكون الكلام طبيعى ، وعلى فكرة المقال ده انا مقتنعة بيه جداً ، ومش عايزة حد يقوللى ، ان الراجل احسن من الست.

دايمًا بنسمع جملة "الست ست والراجل راجل" ، حتى لو الراجل تظاهر، فى الاول بأنه مع حقوق المرأة والشغل ده ،بيجى عند اللى هيتجوزها ويعمل فيها عنتر و ان مرأته متشتغلش وميكونش ليها اصحاب ولاد "احنا مش فرنجة".

طبعاً الاعتيادى فى مكان زى بلدنا بنشوف ان الراجل هو اللى قادر، يعمل كل شىء زى الوحش مش بيوقفه حاجة.
لكن الست كائن فياض المشاعر حساس رومانسى عاطفى ميقدرش على عمل اى شىء من غير الشىء المدعو "الراجل"
لا لا لا انسى كل الكلام ده بقى خالص ونتكلم فى الكلام ده بجد :

اولًا.. بالنسبة لقدرة التحمل: عموما أثبتت بحوث علمية ان الست اقوى من الرجل بكتير جداً وعندها صبر يفوق الرجل مئات المرات .

ثانيًا.. الست هى الضعيفة لانها حساسة : كلام فاضى ، وبالمستندات ، أثبتت بحوث اجريت فى المكسيك ان الرجل اكثر رومانسية من النساء والدليل على كدا ان اغلب المغنين و الملحنين رجالة ، كمان فى الافلام دايما الولد هو اللى دايما اللى بيعبر عن حبه ويقول كلام حب، انما البنات ممكن بيكونوا بيركزوا فى التفاصيل، بس مش اكتر رومانسية من الرجالة .

ثالثا .. ان الرجالة اغبياء: مش فى كل حاجة يعنى ، لكنهم فى الحقيقة اغبياء جداً فى "الكدب" وبيتقفشوا بسرعة، وده اللى اثبتتوا بحوث تم جمعها فى كتاب Why men lie & wamen cry؟، وده اثبت ان الرجال والنساء سواسية فى الكدب ،بس الستات عندها القدرة الفائقة طبعا فى اقناع اللى قدامها ، لكن الرجل غبى جدا وبيتعرف انه كداب بسهولة جداً.

فى توضيح لابد منه ان رجل او ست فى الاخر المسمى العام "انسان" وكل انسان له عيوبه ومميزاته ودى حاجة فردية تماما لكل فرد ربنا خلقه علشان كده بقول لأى انسان سواء ست او راجل احترم الانسان عموما قبل النوع .