أنا وفستاني وأنوثتي

كنت بنت صغيرة بتلعب وتتنطط وبتحلم باليوم اللي هتكبر فيه وتلبس فستان منفوش وجزمة بكعب وتمسك شنطة صغنونة ،كبرت لقيت مصر الحلوة لبست عباية سودا،مفيهاش أي ملامح من الحياة اللي لونها بمبي اللي كانت بتغنيلها السندريلا،لقيت مصر أم الدنيا بقت بتستورد لبس من كل الدنيا بعد ماكانت بتصدر الموضة والأناقة لكل الدنيا،فضلت عايشة حزينة وأنا بشوف بلدي العروسة الحلوة بتدبل وتنطفي،وهويتهاالعظيمة بتختفي ورا لبس متوحش كئيب،خلا بناتها الحلوين بقوا يتكسفوا من حلاوتهم ويداروا جمالهم عشان يتقال عليهم محترمين،الناس بقت بتحكم عالبنت تدفن فطرتها في حب الجمال والأناقة عشان حب الجمال فجأة أصبح جريمة،وفي نفس الوقت بيموتوا نفسهم على فنانات لبنان وبنات كأس العالم والأجانب اللي في شرم الشيخ وبيقولوا أهم دول الستات ولا بلاش مش الغفر اللي عندنا!!!!

أنا بقا من سنتين قررت أرجع لأصلي كمصرية،إختزلت الفترة اللي مصر لبست فيها توب مش توبها،قررت أرجع ألبس زي هوانم مصر زمان،صحيح مالقيتش الدنيا بمبي ولالقيت الناس مؤدبة زي زمان ولا الشوارع نضيفة زي زمان،بس بدأت بنفسي وقولت هحاول،صحيح اتعرضت لإنتقادات وهجوم وساعات تجريح وإهانة،بس أي حد بيغلط فيا هوا أكيد خايف من قوتي في مواجهة تخلفه ورجعيته وجهله،أي واحدة بتنتقدني بأسلوب جارح هيا إنسانة رضيت إن يتقال عليها ناقصة ومش شايفة في نفسها غير أداة للمتعة.

بدأت بنفسي وشاركت في حلمي كل البنات اللي حلمهم مشترك معايا،وشاركني كمان كل الرجال المتحضرين الراقيين ،اللي الأنثى عندهم كائن جميل ورقيق بيستأنسوا بجماله مش بيطمعوا فيه ويحاولوا يغتصبوه،الجمال نعمة من ربنا،ربنا جميل وبيحب الجمال،عمر القبح ماهيكون عبادة ليه أو تقرب منه!!!!!

عملناحملة بإسم" إلبسي فستانك واستردي انوثتك" إرجعي بنت حلوة بتضحك للدنيا وإبتسامتها منورة وشها وسعادتها مالية قلبها،إتغلبي على ضغوط الحياة بإنك تلبسي فستان جميل كل تفصيلة فيه وكل لون جواه بيعبر عن شخصيتك وأملك وحلمك،بصي للحياة بعيون فرحانة وانتي بتلفي بفستانك قدام المراية وحاسة إنك مركز الكون وكل الكواكب بتدور حواليكي لأنك الشمس اللي منورة حياتهم.

شاركينا حملتنا لإستعادة الشكل الحضاري لهوانم مصر زمان،شاركينا حربنا ضد الرجعية والتخلف والجهل وطمس الهوية المصرية،وإنت كمان إعلن للدنيا كلها إنك راجل مثقف ومتحضر وبتحترم حريةمراتك واختك وبنتك وبتحب تشوفها في أبهى صورة لأنك بتحب تشوفها سعيدة.

"إلبسي فستانك وإستردي أنوثتك "دعوة لعودة الجمال والأناقة لشوارع مصر،دعوة عشان نرجع مصر البهية،دعوة إننا نثبت زي مافي رجال متحرشين وعديمي الأخلاق،عندنا رجال أكتر منهم بكتير مثقفين وراقيين ويشرفوا مصر.