تعرف على تفاصيل لعبة "البوكيمون"

الناس اللي كانت بتسأل ايه هو موضوع ‫لعبة "البوكيمون‬" ... البوكيمون هو لعبه جديده نازله علي بلاي ستور في امريكا ..اللعبه بتشغل فيها ال GPS وكاميرا الموبايل وبتمشي كأنك بتصور فيديو .. ببيبتدي يظهر قدامك ع الشاشه المكان اللي الكاميرا مصوراه و اي شخصيه من شخصيات بوكيمون بتاعه زمان زي بيكاتشو واخواته ...بتظهرلك ع الشاشه ..وبتجري وانت بتجري وراها.

المهم انك بتمشي وراه ...وتتحرك من مكان لمكان عشان تمسكه ..وتجمعهم يعني ممكن تبقي واقف في الصاله والبوكيمون يتحرك يروح الحمام تجري وراه بسرعه وانت ماسك الموبايل ..وتزنقه في البانيو وتحلق عليه.

لحد هنا مفيش مشكله ... المشكله والحدث ده بسبب ان البوكيمون ده بيتحرك وبيجري وبيبقي مستخبي في اماكن مختلفه ...وحصل ان في امريكا حصلت حوادث طرق بسبب شباب بيعدي الشارع قدام العربيات بسرعه وهو مركز في الموبايل عشان يقفش البوكيمون اللي هو شخصيه افتراضيه قدامك ع الشارع بس بتتحرك مع تحرك كاميرا الموبايل فده خلي العربيات تفادي الاشخاص دي وتلبس في بعض.

ده غير انهم في قسم الشرطه في امريكا بقوا قاعدين في امان الله يلاقوا شاب طويل عريض داخل القسم ... وبيقول للظابط بعد اذنك ممكن نحرك المكتب ده عشان البوكيمون مستخبي تحتيه ...او ممكن تفتحلي الحجز عشان البوكيمون دخل جوه ومش عارف اجيبه ... طبعا في مصر هنا مستحيل البوكيمون يدخل اي قسم لأنه عارف انه مش هيطلع لا هو ولا الاهبل اللي بيلعب اللعبه ..وهيطفوا السجاير تحت باطاطته.

ده غير بقي العيال اللي بتطلع تخبط علي جيرانها في نص الليل عشان تدخل تجيب البوكيمون اللي خرج ع السلم ودخل الشقه اللي قصاده ...وهو الواد ماشي زي العبيط وراه ...
لعبه بوكيمون دي كانت علي ايامنا زمان وكان استيكر ورق كده بيطلع في اللبان والشيبسي باين ... وكنا بنشتريهم عشان نجمعه مش عشان ناكلهم ..وكنا بنلعب قمار بيه اللي هو تقلب الصوره علي ضهرها ..وتخبطها بحرفنه معينهبأيدك وانت ..بتقول بعض التعاويز في سرك زي "بيكا بيكاا بيكاتشووو " فتتقلب الصوره علي وشها سبحان الله ... ولازم تقلبها 3 مرات ورا بعض متتاليه عشان تكسب وتقش الصوره اللي مع زميلك.

وكانت الصور النادره ليها سعرها...ومطلوبه....ممكن تبقي ب 3 او 5 او 10 صور عاديه ... ...وياما حصلت خناقات وعيال خربشوا بعض وفقعوا عين بعض بسبب بيكاتشو وحيوان السلمندر وغيره ....لحد ما طلعت اشاعه وقالولنا ان البوكيمون ده يهودي ..ومعنا كلمه بوكيمون يعني " انا يهودي وافتخر " وعشان كده ..... كان فيه منا اطفال غيوره علي دينها ساعتها قامت حرقت شقا عمرها ومئات الصور اللي جمعوها بطرق مشروعه وبطرق غير مشروعه لنصره الاسلام والقضيه الفلسطينيه ومحمد الدره ا ... وفيه مدرسين اخدوا الصور من العيال وهددوهم بأستدعاء ولي امر بتهمه التفريط في حق القضيه الفلسطينيه والانتماء لحركات يهوديه مسلحه ... وقالولهم يا خونه يا كلاب يا عملا.

المهم ان اللعبه رجعت تاني ...وبقت متطوره وع الموبايل ...عشان تسحل اجيال تانيه معاها منهم الجيل بتاعي برضه والاجيال الاكبر والاصغر ...تسحلهم في كلام فاضي ملوش اي تلاتين لازمه ..بس الفرق دلوقتي ان عشان تكره العيال في بوكيمون ...مش هتقولهم ده يهودي ..عشان عادي يعني احنا واسرائيل اشقاء ... فحاولوا لما تكرهوهم فيها اختاروا حاجه مقززه ...فهموهم ان بوكيمون دي كلمه اغريقيه معناها " احمد موسي " مثلا او "الخليل الكوميدي .

بس يا سيدي دي قصه البوكيمون اللي قالبه الدنيا ..استنوني بكره بقي في نفس المعاد ..عشان اكشفلكم هويه المحقق كونان والمحقق توجوموري اللي هيطلع حرامي في اخر حلقه.