زينة تسخر من أحمد عز بعد خسارته قضايا التوءم: «أحدث صورة للشيطان»

حرصت الفنانة زينة، على التعبير عن سعادتها بخسارة الفنان أحمد عز لكل القضايا التي أقامها ضدها، بشأن طفليها.

ونشرت "زينة"، صورة له، عبر صفحتها الشخصية على موقع "إنستجرام"، وعلقت عليها قائلة: "الحمد لله النهارده كانت آخر قضية رافعها علينا الشيطان.. والحمد لله مايقدرش الشيطان يرفع أي قضية تاني.. الموضوع اتقفل نهائيا ورفع علينا كل القضايا اللي ممكن تترفع والحمد والشكر لله ربنا كرمنا وخسر كل القضايا.. الشيطان ده قبل ما يخسر كل القضايا خسر نفسه اللي مش موجودة أصلا وضميره المعدوم وحتى شكله اللي بقي أستغفر الله العظيم.

وتابعت: "نصيحة ليكم إياكم والظلم إياكم والقسم بالكذب.. كلمة أقسم بالله بالكذب بتهز السموات.. بص يا شيطان كل القضايا اللي ينفع ترفعها خسرتها.. كبيرك تتكلم في سمعة أم ولادك وإنت عارف بتقول كده.. بس ياريت تثبت كدبة علشان بتنسي كدبك وكل يوم بقصة".

وتوجهت بالشكر للمحامي الخاص بها، والذي وقف بجوارها في أزمتها مع "عز"، قائلة: "شكرًا الأستاذ الكبير المحترم معتز الذكر المحامي اللي تعب معايا خلاص ارتاح من قلقي والصداع اللي عملتهوله.. ومبروك يا أستاذ معتز على قدوم القمر زينة الصغيرة وربنا يكرمك ويخلي زينة وعبدالله.. كملت مسيرة الأستاذ الكبير محمد الدكر الله يرحمه يارب.. شكرًا الأستاذ عاصم قنديل المحامي الكبير اللي بعتبره واحد من أهلي.. أنا تعبتك أوي يا أستاذ ربنا يخلي حضرتك".

واختتمت حديثها قائلة :"سامحوني على الصورة دي واعرفوا إنها مخوفاني أنا كمان والله للأمانة ما كان هو ده شكله.. بس الظلم والقسم كدب بينزل غضب ربنا على أغلي حاجة عند الإنسان.. وده أغلي حاجة عنده وشه.. بعتذر على بشاعة المنظر، دي أحدث صورة للشيطان لقيتها في وشي معلش".