«مايكل جاكسون أصيب بالبهاق».. تامر حسني يدعم رامي جمال في مرضه

أثار الفنان رامي جمال مشاعر زملائه من الوسط الفني ومتابعيه على مواقع السوشيال ميديا، بعدما أعلنت عن إصابته بمرض البهاق وتغير لون جلده، وكتب رامي جمال كلمات مؤثرة على صفحاته الرسمية على مواقع التواصل الإجتماعي.

ودعم تامر حسنى الفنان رامى جمال، حيث نشر صورة تجمعه به، عبر حسابه الشخصي على مواقع التواصل الاجتماعي «انستجرام» ووجه من خلالها رسالة طويلة للشد من أزره فى هذا الموقف.

وكتب تامر حسني للفنان رامي جمال قائلًا: «إلى الفنان الكبير و الصديق الحقيقي و المحترم رامي جمال يا حبيبي أنت فنان كبير و محبوب و ليك قيمتك و كل الناس بتحبك و مفيش حاجه هتعطلك عن نجاحك، و تعبك دا لاهو مؤذي ولا مُعدي و كل الناس جواها تعب في منه اللي ظاهر و في منه اللي مش ظاهر حتى لو كان تعب نفسي أو مادي كل شخص جواه وجع من حاجه معينه».

وأكمل تامر: «المهم أننا نبص و نتعلم من اللي ظروفهم أصعب مننا و رغم كدا عندهم صبر و بينجحوا في الإختبار و بيقولوا الحمدلله ومكملين وعندهم إراده و بينجحوا أكتر من الأول لازم تكمل نجاح يا رامي و شيل أي هلاوس من دماغك و إوعى تخبي نفسك اللي بيحبك بيحبك لشخصك و فنك صدقني دي حاجه عادية يا رامي والله ملهاش أي تأثير لا عليك ولا على جمهورك بالعكس بقى أنت أكيد شايف الناس كلها طيبين أزاي و نفسهم يفرحوك».

واختتم تامر حديثه: «وبعدين إفتكر إن مايكل چاكسون جاله نفس اللي جالك و بقى أسطوره مبتتكررش خاالص وانت فنان و عارف، أنا واثق إنك مؤمن و بتحمد ربنا و هتقوم و هتكمل وهفكرك قدام كل الناس اللي شايفه كلامي إنك هتنجح أكتر و أكتر و ربنا هيكرمك أجمل كرم و هتشوف قريب بحبك يا رامي».