هالة زايد في مهب النيران.. اتهامات تلاحق وزيرة الصحة بعد حادث أطباء 15 مايو

فاجعة شهدتها منطقة 15 مايو صباح اليوم، بعد أن خيّم الموت على أطباء وزارة الصحة المتوجهين لعمل التكليف المكلفين به، وحضور مؤتمر فحص سرطان الثدي.

وفي حادثة لم تمر مرور الكرام، توفى بها 4 أطباء وأصيب 17 آخرين، بعد تصادم الميكروباص الناقل لهم إلى محل عملهم. والذي خصصته الوزارة لنقلهم صباح اليوم. بعد تبليغهم بالتكليف في وقتٍ قصير.

من هنا سلّط إتحاد شباب الأطباء على موقع فيس بوك الضوء على الإهمال الجسيم الذي راود هؤلاء الضحايا غير المسؤولين عن ما حدث لهم. والذين كانوا ضحية إهمال وتهاون من قِبل الوزارة.

وقالت صفحة «أطباء مصر» على فيس بوك: «وزارة الصحة عامله مؤتمر لصحة المرأة في القاهره ومطالبة الطبيبات من الادارات الصحية تسافر عشان تحضر
ومبلغين الطبيبات قبلها بيوم ومش موفرين ليهم وسيله مواصلات عدله غير ميكروباص معفن لدكاتره محترمين حتي مش هيلحقوا نحجز في القطر ! والمفروض يتحركوا الساعه 3 الفجر».

وأضافت الصفحة: «لما أغلب الناس اللي حامل واللي معاها طفل واللي لسه عروسه مكملتش اعتذرو وقالو مش هننفع نسافر وفي البرد وخطر علينا و في كذا حل تاني الأول تأجيل معاد المؤتمر لحين الحجز في القطار في موعد مناسب مش يسافروا الساعه 3 الفجر عشان يبقوا في المؤتمر 8 الصبح !

الحل التاني إن يقام المرتمر والتدريب في محافظتهم في المنيا مثلا و سهل توفير مدرب. هل دكاتره المنيا كلهم مفيهومش دكتور يقدر يدرب أطباء الواحدت علي فحص سرطان الثدي ؟ ولا لازم سفر وبهدله 50 دكتوره لحد القاهره عشان الوزاره تاخد اللقطه !
الأدهي و الأمر من كده إن لما الطبيبات دول قدموا إعتذرات وطلب بالتاجيل أو إقامه التدريب في محافظتهم كان رد مسؤلي الوزارة إنه ههددهم إن اللي هتعتذر او مش هتيجي هيتم نقلها خارج محل عملها القريب من سكنها وتتشحطط وتتبهدل أه والله كده !!

وآدي النتيجة الميكروباص عمل حادثه وأكتر من 10 طبيبات من خيره شباب الأطباء لم يتجاوز عمرهم 26 سنه فرحه أهلهم بيهم لسه بتنور للدنيا .. بقوا ما بين متوفي أو عاجز او بين الحياة والموت .. اللي حامل سقطت واللي لسه عروسة ماتت واللي في العنايه المركزة مش عارفين هتطلع ولا لا واللي عندها كسور مضاعفه ومش عارفين هترجع سليمه ولا هتعيش بعاهه واللي عندها نزيف في المخ واللي سليمه نفسيتها بقت ف الأرض».