عاجل
الجمعة 29 مارس 2024 الموافق 19 رمضان 1445
رئيس التحرير
عمرو الديب

هبة السويدى ترد على حملة انتقادات إعلان مستشفي الحروق بهذه الطريقة (فيديو)

تحيا مصر

انتشرت حملة انتقادات كبيرة خلال الأيام القليلة الماضية بسبب إعلان مستشفى أهل مصر للحروق، وهو ما دفع هبة السويدي، مؤسسة مؤسسة "أهل مصر" للرد على حملة انتقادات إعلان مستشفى الحروق. 

قالت هبة السويدي في ردها: "بعتذر لكل واحد الإعلان ضايقه أو تسبب في اذيته وبقولكم حقكم علينا وعليا أنا شخصيًا، الإعلان قاسي بس خلينا نشوف الناحية الإيجابية اللي فيه ونوعي ولادنا ونفهم الصح من الغلط والأخلاق والرحمة ومنخوفهمش من ضحية الحرق اللي اتشوه وحصله إعاقة، بالعكس نتكلم مع ولادنا ونشرحلهم ونفهمهم يعني أيه تقبل الآخر.

وأضافت هبة السويدي: "صدقوني أي طريقة حنقدم بيها إعلانات الحروق حترفضوها برضه….احنا حاولنا بكل الطرق ولحد دلوقتي احنا المؤسسة الوحيده اللي ما استخدمتش المرضى اللي هما حالات الحروق في إعلاناتهم…بس برضه الناس رافضه الحادثة لأنها مؤلمة إلى أقسى حد ممكن مخ الانسان يتصوره". 

وتابعت مؤسسة "أهل مصر": "دعمكم النفسي لضحايا الحروق لا يقل أهمية عن دعمكم المادي… وأنا بعتبر نفسي وأهل مصر ربنا اختارنا اننا نشيل رسالة ونكون صوت ضحايا الحروق ويارب يجعلنا قد المسؤولية دي..سيدنا محمد صلى الله عليه وسلم، والأنبياء والرسل في سبيل دعوة الحق، اتحاربوا واتقال عليهم أسوء الكلام واتهموا بالجنون وعذبوا وابتلاءاتهم كانت أكبر من قدرة أن يتحملها بشر.. نيجي ايه ولا اجي أيه جنبهم ده الواحد محصلش 0% حتى، أيه يعني شوية ابتلاءات على شوية إرهاق على شوية انتقادات تعدت إلى مرحلة الإساءة والشتايم في كثير من الأوقات على عدم تقدير من بعض الجهات أو بعض الناس، على ناس تقرر لوحدها أنها تعاديك وتخسرك علشان إعلان تليفزيون وتقطع الخير عن ضحايا الحروق اللي كل ذنبهم انهم اتعرضوا لحادثة مالهمش ايد فيها، ومستشفى اللي هي أمل أكتر من 250 ألف واحد بيتحرق وبتتعرض حياته للخطر كل سنة في مصر، ده غير الدول المجاورة والعربية اللي المستشفى حتكون فاتحة بابها ليهم علشان الإعلان اللي هو كله قصص حقيقية ضايقهم فبيعاقبونا ويشتمونا". 

وأوضحت أنها لا تنزعج من نقد إعلانات مؤسستها: على فكرة أنا عمري ما بضايق من النقد البناء واسألوا كل اللي شغالين معايا والقريبين مني، بالعكس أنا دايمًا فاتحة قلبي وبابي أسمع وأتعلم علشان أحسن من نفسي وفكري وأقدر أخدم أكتر، بس لما النقد يتعدى للإهانة والشتايم ونقد يهد مجهود ناس مش بتنام وآلام وأوجاع ضحايا محدش حاسس بيهم ويكون بالابتذال ده، لا أنا أسفة كده كتير". 



تابع موقع تحيا مصر علي