إيناس عز الدين تشهر قسيمة طلاقها بعد شائعة اختلاقها قصة الانفصال عن زوجها لـ "لم الفولورز" (صور)

نفت المطربة إيناس عز الدين، ما روّجه أحد الصحفيين حول "تمثيلها" الإنفصال عن زوجها المخرج أحمد قمر، وأن الزوجين مازالا على علاقتهما الزوجية، مؤكدة أن الصحفي طالبها بإظهار قسيمة الطلاق "إن وجدت" مُشككا في كونها مُطلقة وأنها مازالت على ذمة زوجها.

وهددت إيناس عز الدين الصحفي بفضحه وطالبته بالاعتذار لها بعد أن اشهرت قسيمة طلاقها الأصلية والتي تعود إلى عامين، مؤكدة أنه رغم الانفصال عن زوجها إلا أنهما تجمعهما علاقة صداقة راقية اعتبارا للعشرة.

وكتبت إيناس عز الدين على صفحتها الشخصية بموقع "فيس بوك": "ما كنتش احب ابداً انزل بمستوايا و ارد بالشكل ده ولا عمري انكلمت عن اسباب انفصالي انا واحمد ولا عمري هتكلم عنها لانها اسرار بيوت و انا و الراجل لاننا ولاد اصول حفظنا بعض وقت ما كنا متجوزين وحتى لما انفصلنا عمر ما حد فينا جاب سيرة التاني بكلمة وحشة و كنا سند لبعض و ده لاننا احنا الاتنين ولاد اصول و اهالينا ربونا على صون العشرة والعيش و الملح".

وتابعت ايناس عز الدين: " وصلني ان فيه واحد صحفي مش عايزة طبعاً افتح كلام و اقول هو قالب وشه عليا ليه بعد ما كان من الاصدقاء المقربين او اللي بيمثلوا انهم مقربين وانه اخ لينا منزل بوست اتهام صريح ليا اني ما انفصلتش عن احمد ولا اتطلقنا اساساً وانه حوار وفيلم اننا رجعنا لبعض وانه بيتحداني اطلع ورقة طلاقي لانها مش موجودة وانه عنده الدليل وطبعاً كام خروف وخروفة داخلين يأيدوه بدون وجه حق".

وأضافت إيناس: "طبعاً لانه جبان ما قدرش يكتب اسمي تحديداً و يواجهني وجهاً لوجه و راجل لست بميت راجل بس لاني اجدع منك يا سامح انا بكتب اسمك و بوجه لك البوست ده قدام كل الناس مش في الدراء ولا الخفاء وبقولك ادي قسيمة طلاقي من اكتر من سنتين مكتوبة ومترخة هل انت بقى راجل وعندك شجاعة الاعتذار عن الخطأ ولا كالعادة مجبرين نتحمل اسلوبك السيء زي ما كل اللي حواليك بتعمل معاهم ويسكتوا ونيجي على نفسنا مراعاة لظروفك رغم انك ماشي تلطش في الناس كل شوية وكلهم بيتحملوا ويسكتوا ويعدوا وانا اولهم ياما عديت".

واستكملت "إيناس": " معلش المرة دي خرجت أوت منك و وقعت مع واحدة ما بيفرقش معاها حاجة وما بتخافش من حد وحياتها كلها طول عمرها على عينك يا تاجر ومش بتكتب بوستات رمي كلام على حد لاء دي بترقع في الوش.. صحيح نسيت تبارك للناس اللي انت أكل معاهم عيش وملح وكنت بتقول عليهم اخواتك وحبايبك سنين و خسرتهم وبقيت عدو ليهم علشان سبوبة برنامج كنت عايز تنط عليها رغم ان اللي جايباها بنت معدة برامج و صحفية.. عيب انا سكت كتير بس مش هسكت تاني".