نائبة تعدد الزوجات باكية: دبحتونى بكلامكم.. وحسبى الله ونعم الوكيل فى كلام الجرايد ( فيديو)

نشرت مرشحة مجلس النواب، وفاء صلاح الدين، فيديو جديد على صفحتها الشخصية، فيس بوك، عبرت فيه عن حزنها البالغ، نتيجة الهجوم عليها من الألاف على مواقع التواصل الاجتماعى.

وقالت خلال حديثها:" أنتم دبحتونى بالمنشورات اللى نزلت عنى فى الجرايد، الكلام دا أنا ماقلتوش، وأنا زعلانه على نفسى وواخده على خاطرى أوى من الناس اللي بتشتمني، أبوس أيديكم مش عايزه أكره بلدي، أنا أتبهدلت كتير ومحدش وقف جنبى".



وكانت وفاء قد أثارت الجدل بعدما، أعلنت تأييدها لزواج الرجل لأكثر من امرأة، باعتبار هذا مصدر أمان، وعبرت عن ذلك بجملة شهيرهى (ضل راجل ولا ضل حيطة).

وتابعت حديثها:" الواحد لما بيتجرح او يتظلم بيروح لأهله، انا أهلي مش جنبي أمي وأخويا بره مصر، أتكتب عليهم الغربة، أنا عايزه أكون حد كويس وأشرف أهلي وربنا يعوضني عن سنين شقاء كتير، بكلامكم ده هتضيعوني، حسبي الله ونعم الوكيل في كل جريدة قالت تصريح مش منسوب ليا”.

واستكملت قائلة: "الناس اللي عماله تبعت لأمي وتقولها الحقي بنتك الجرايد بتتكلم عنها، انتوا كنتوا فين وانا كنت بقعد في بلكونة بيتنا وأعيط وأنا ببص للبيوت وأقول ياريت أمي كانت معايا، كنتوا فين لما كان ييجي عليا رمضان وأنزل أفطر على موائد الرحمن علشان مبقاش لوحدى".

وتابعت وفاء صلاح الدين حديثها، "أنا شوفت اللي محدش شافه، كنت في الجامعة زمايلي يقولوا أنا هروح الاقي ماما كذا، هروح علشان اخرج مع ماما، وأنا كنت بروح بحس إن البيت قبر علشان ببقى فيه لوحدي، قعدت سنه ونصف مريضه محدش سأل عليه ولا فيا إيه الناس مابترحمش".

وأضافت: “لما اترشحت في الانتخابات الناس قالولي إنتي بنت مين علشان ترشحي نفسك، هو انتي عندك ايه علشان ترشحي نفسك هو انتي اهلك مين وعندهم ايه، وقالت أنا معنديش حاجه، بس أملي في ربنا كبير، نفسي أقعد مع أرملة، يتيم، مريض أعملهم حاجه من غير حتى ما يتكلمو".

وأختتمت الفيديو قائلة: “أنا يتيمة وكنت بطلع أقول للأسر حسوا بالأيتام خصصوا ليهم وقت، كنت بقول بلاش تكسروا بخاطرنا، مؤكده فقدانها والدها في عمر 4 سنوات”، مشيرة إلى أنها حاربت من أجل الوصول لحلم شخصي وكان لديها خيارين أن تكون فتاه سيئة أو تشرف والدها المتوفي، وعندما تلقاه يكون راضٍ عنها، وأنهت مرشحة شبين الكوم حديثها للمواقع والجرائد قائلة فوضت أمري لله.