عاجل
الجمعة 29 مارس 2024 الموافق 19 رمضان 1445
رئيس التحرير
عمرو الديب

عايزاه يلبس بنطلون وقميص ويخلع الجلابية ويحلق شنبه.. سحر بمحكمة الأسرة: هخلع جوزي واحنا بقينا مودرن

زوج وزوجة
زوج وزوجة

«أنا عايزة جوزي يخلع الجلابية ويحلق شنبه ونغير في حياتنا ونسيب عيشة الصعيد دي اللى كنا عايشنها هناك ونبقى زى الناس اللى عايشين وسطهم دلوقتي».. كلمات كالرصاصة اطلقتها سحر وهى تحكى مأساتها لـ تحيا مصر عن قصتها مع زوجها العامل من داخل محكمة الأسرة.

فتقول سحر البالغة من العمر 39 عاماً:" أنا اتجوزت منذ 13 سنة وعندى طفلين، وجوزى رجل فلاح بسيط يمتلك قطعة الأرض ويزرعها ويحصد ثمارها لأجل الأطفال والإنفاق على متطلبات الأسرة، وفكر جوزى في إننا نبيع قطعة الأرض ونسافر نعيش في القاهرة ونشتغل ونعمل حاجة علشان نعلم الأطفال بشكل أفضل ونربيهم".

السفر للقاهرة

وتضيف سحر: "أنا وافقت على اقتراح جوزى، بالسفر والعيش في القاهرة وتربية وتعليم أفضل للعيال ورزق أحسن للأطفال، وبفلوس الأرض نأجر شقة كويسه وندخل العيال مدارس وفرصة الشغل في القاهرة أفضل من سوهاج، والمدن الريفية فرصة الشغل فيها قليلة جدا عن الشغل في المدن الصناعية".

وتحكى سحر: "لما سافرنا القاهرة روحنا مدينة نصر وهناك سكنا في حجرة فوق عمارة، واشتغل جوزى في الفاعل بيشيل رمل وطوب، وأنا اشتغلت عاملة نظافة في نادى بمدينة نصر، واحده هناك في العمارة جابتلى الشغلانه وعجبتنى، وكسبت من الشغلانة مصدر رزق كويس واتعاملت مع ناس ذات مستويات عالية واكتسبت منهم علاقات ساعدتنا في إننا ننقل لشقة بدل الحجرة اللى كنا نسكن فيها".

بقينا مودرن

وتستكمل سحر: "بطبيعة الحالة اللى وصلنا ليها، وانتقلنا لمستوى أعلى وأفضل من اللى كنا عايشنه من البيت والحجرة اللى فوق عمارة إلى شقة بتاعتنا، فتغير لبسى ولبس العيال والمدارس، وبالتدريج اتغيرت أفكاري وطريقة تفكيري، وقولت لجوزى أنه لازم يخلع الجلابية ويحلق الشنب، ويلبس بنطلون وقميص علشان يكون مودرن زى سكان مدينة نصر اللى عايشين حوالينا".

بلاش جلابية ولا شنب

وتسترسل سحر: "قولت لجوزي بلاش جلابية ويحلق الشنب، بس جوزى زعق فيا بصوت عالى واتهمنى بإنى ناكرة الأصل وإنى لما قولتله يخلع الجلابية كده هخليه ينسى بلده وأصله وطينه وأرضه، وجوزي مش شايف أن ده تقدم وتطور ولازم يغير الجلابية ويكون زي الناس اللى بشوفهم بقميص وبنطلون وبدل".

زهقت من جوزي

وتقول: أنا زهقت من جوزى بسبب رفضه خلع الجلابية ويحلق الشنب ويتنازل شوية ويلبس جينز وقميص وهو مش راضي يتغير، فطلبت منه الطلاق علشان أفكار جوزى اللى مش راضيه تتغير دى، ورفض طبعا الطلاق، فرفعت دعوى خلع ورفعت نفقة على جوزى، علشان أنا شكلى مش هينفع معاه بالجلابية والشنب ده".

تابع موقع تحيا مصر علي