عاجل
الجمعة 29 مارس 2024 الموافق 19 رمضان 1445
رئيس التحرير
عمرو الديب

مأساة آدم فقد بصره بسبب الإهمال الطبي.. ووالدته: أبني هيعيش بقية عمره مش بيشوفني وإحساس الذنب جوايا قاتلني

تحيا مصر

" وديته حضانه هو وأخوه واحد منهم طلع سليم والتاني أتعمي " بتلك الكلمات روت والدة الطفل آدم ووالده في بث مباشر لتحيا مصر  عن طفلهما الذي تعرض لإهمال شديد في حضانة بمنطقة بهتيم مما نتج عن هذا الإهمال فقدانه لبصره ليعيش والديه بقية حياتهم يبحثان عن حلول طبية له ويسيران في إجراءات قانونية تجاه المتسبب في تلك الكارثة .

تحيا مصر

فضلت 3 سنين مش بخلف وربنا رزقني في النهاية  بتؤام 

بدأت الأم حديثها لتحيا مصر :" أنا وجوزي متجوزين من 3 سنين ومكناش بنخلف لكن في النهاية ربنا رزقنا بتوأم وسميناهم "آدم" و " آسر" و ربنا أراد أنهم ينزلوا في أول يوم من الشهر التامن في الحمل وانا مشوفتهمش لأن جوزي خدهم ووداهم حضانة لحد ما نموهم يكتمل ونتأكد أن معندهمش أي مشاكل صحية ومن استعجالنا مسألناش علي الحضانة دي قبل ما نروحها ولا سألنا هي كويسة وبتهتم بالأطفال ولا لا ودي كانت غلطة كبيرة مني أنا وجوزي هندم عليها بقية عمري ".

لما كنت بزور ولادي كنت بلاقي الأطفال متشوهة وبتصرخ 

وتابعت الأم حديثها :" لما قومت من المستشفي وروحت أزور أولادي قلبي كان بيتقطع علي الأطفال اللي هناك وكنت واقفة ببكي عليهم شكلهم تعبان وفي منهم كان في تشوهات في جسمه ووشه وبيصرخوا بشكل رهيب  روحت اتتكلمت مع مسؤول الحضانة " الدكتور إبراهيم " وسألته " هي لية الأطفال شكلها عامل كدة  ولية مفيش أي تحسن بيوصلوله ؟ " راح رد عليا وقالي " هو أنتي بتسأليني في أية ؟ هما اصلا جايين عندنا ومنعرفش هما هيعيشوا ولا هيموتوا " روحت سلمتها لله ودي كانت غلطة أكبر أني شوفت الوضع بالشكل ده وسكت ".

كنا بنلبس نفس الروب والشبشب كلنا عشان نزور عيالنا ومفيش أي نضافة  

ليتابع الأب بقية الحديث :" لما لقيت أولادي في الحضانة دي مش بيحسوا بأي تحسن ومفيش أي وقاية ولا إهتمام لدرجة أن كل الأهالي بتلبس نفس الروب والشبشب عشان يزوروا عيالهم قررت أخرجهم منها لكن معرفتش أوديهم حضانة تانية لأن تقاريرها صعبة فوديتهم عيادات أسمها " عيادات الخير كتير " وسمعتها كويسة وتبع التأمينات ولما أستلموا مننا الحالة قالولنا أن " آسر " حالته كويسة عن " آدم " وأن آدم كان متركبله في الحضانة " سنتر " في رقبته وهما في العيادات دي شالوه فورا وقالولنا أن " السنتر " ده ممكن عمله " خراج " وصل للمخ ونتج عنه نزيف ومكروب ونقص في الأوكسجين من الدرجة الرابعة ".

الدكتور قالي العوض علي الله في عين أبنك 

واستكمل الأب حديثه :" بعد ما قالولنا كدة في العيادات حاولوا يعالجوا حالته علي قد ما يقدروا وبعدين عيالي رجعوا البيت وبعد ما بقي عمرهم 4 شهور لاحظت أنا ومراتي أن " آدم " مش مركز زي أخوه وأكنه مش شايفنا فودناه لدكتور في عيادة خاصة والدكتور ده قالنا لازم تعملوا " فحص قاع للعين " ولما عملناه قالنا " العوض عليك في عين أبنك، حالته متأخرة جدا ولو كنت جيتلنا من البداية كنا عملناله جلستين ليزر وأتحلت المشكلة لكن دلوقتي فات الأوان " حسيت بقهرة أنا ووالدته وبندورله علي أي حل طبي وماشيين في الإجراءات القانونية عشان نعاقب الفاعل واللي ضيع عين أبني وحسرني عليه ".

تابع موقع تحيا مصر علي