إلهام شاهين: التعصب موجود لأن فيه ناس بتفهمنا الأديان غلط

كشفت الفنانة إلهام شاهين عن رأيها في التعصب الديني وسبب وجوده بشكل كبير في الفترة الأخيرة، وذلك خلال ندوتها اليوم بمنتدى حوار الثقافات بالهيئة القبطية الإنجيلية للخدمات الاجتماعية.

تحيا مصر يرصد تفاصيل تصريحات إلهام شاهين عن التعصب

حيث قالت إلهام شاهين: “التعصب موجود لأن فيه ناس بتفهمنا الأديان خطأ وبتنشر أفكار خاطئة، وفيه ناس ثقافتها محدودة فبتتأثر، وفي ناس بتفسر الآيات غلط.. ولكن الغلط مش في الدين".

وتابعت: "الغلط في من يفسر الدين، لما حد يقول اللي مش بيصلي يستتاب ثم يقتل، طيب وأنتم مالكم لو عاوز ربنا يموته أو يعاقبه ربنا هو اللي بيحاسبنا مش البشر، هل أنت هتراقب الناس وتشوفهم صلوا كام مرة في اليوم، بصراحة في كلام مستفز وما زال يعرض”.

إلهام شاهين تدافع عن فيلم صاحبتي 

وكانت قد تحدثت إلهام شاهين عن الجدل الذي أثير خلال الفترة الماضية بشأن مشهد قبلة ابنة شقيقتها في فيلم صاحبتي.

وقال إلهام خلال مداخلة هاتفية أجرتها في برنامج الستات والتي تقدمه الإعلامية سهير جودة ومفيدة شيحة: إحنا مش عايزين فن للتسلية إحنا إحنا عايزين فن يكون له رسالة، في أدوار حتى لو الناس شايفة إنها في جرأة أو شر أو أخطاء أو واحدة منحرفة، ولكن في نهاية العمل بيكون ليه رسالة مهمة.

وتابعت: مش المشكلة بس في مشهد بوسة، لو أنا بقدم دور تاجرة مخدرات ما هي بتؤذي المجتمع والناس، لو بقدم دور إرهابية زي مسلسل (بطلوع الروح) بتقتل وتجلد وتموت الناس، هل أنا كده بعمل شيء غلط؟! لأ، لأني بفيد المجتمع، لأن بقول رسالة مهمة جدا من هذا الدور المكروه.

إلهام شاهين وتكريمها في الدير جيست

وسبق، وأن تحدث الهام شاهين عن تكريمها في حفل توزيع جوائز مجلة الدير جيست عن مسلسل بطلوع الروح، فقالت: دايمًا دير جيست تجمعنا وتفرحنا ونحتفل بالفنانين اللي أسعدونا، ويارب السنة اللي جاية تكون سنة جميلة مفيش فيها أوبئة ولا أمراض ولا حروب ولا حالة اقتصادية صعبة وإن شاء الله اللي جاي أجمل، لازم دايمًا نتفاءل.

وتابعت: أنا سعيدة جدًا بالجائزة لأن استفتاء الجمهور بيكون فيه قيمة كبيرة جدًا، وخصوصًا الجوائز الكتير اللي أخدها مسلسل بطلوع الروح، ليا ولكل العاملين أمام الكاميرا ووراء الكاميرا، هي رد على كل المتاجرين بالدين وكل المتطرفين اللي إحنا كلنا بنحاربهم، يا رب دايمًا ينصرنا عليهم ومصر أكبر منهم بكتير أوي، ويارب كل الخير لمصر ولكل الوطن العربي إن شاء الله.