زوج لـ تحيا مصر: مراتي بتحكي للعيال قصص جن وعفاريت وبتقولي أنا كدة بربيهم

مأساة زوج مع زوجته في محكمة الأسرة، قرر رفع دعوى نشوز عليها وذلك لتأديبها مرددا بأنها تروي لأطفالهم قصص مرعبة وأن منزلنا مسكون بالجن وذلك لتربيتهم.

"بتوهمهم أننا عايشين في بيت مسكون ولو مسمعوش الكلام العفاريت هتطلعلهم " بتلك الكلمات روي زوج لتحيا مصر من داخل محكمة الأسرة عن زوجته التي تربي أبنائهم بصورة خاطئة وتدخل إلي أذهانهم معتقدات لا يصلح أن يفكروا بها في أعمارهم الصغيرة ليوبخها الزوج في كل مرة ولكن لا تتعظ حتي قرر رفع عليها دعوي نشوز علي أمل تأديبها . 

مراتي أبوها كان بيحبسها في أوضة ضلمة وده عملها عقدة

بدأ زوج السيدة حديثه لتحيا مصر :" أنا ومراتي عندنا طفلين طفل عنده 10 سنين وطفل عنده 8 سنين مراتي كانت بتحكيلي أن أبوها كان بيحبسها في أوضة ضلمة بالساعة والساعتين لما بتغلط في حاجة وكان بيعمل كدة عشان يعلمها تسمع الكلام وكانت بتحكيلي أن ده عاملها عقدة من صغرها لكن أنا كنت فاكرها حاجة قديمة في حياتها وخلاص أنتهت ومتوقعتش أنها تبقي سايبة فيها أثر لحد أنهاردة ".

بقيت بتقول للعيال أحنا عايشين في بيت مسكون عشان تخوفهم 

وتابع الزوج :" مراتي لما عيالنا بدأوا يكبروا وطبعا هما أولاد والولاد بطبعهم أشقيا وتربيتهم صعبة فبدأت تربيهم بالشكل اللي هي أتربت عليه زمان بدأت تحكيلهم قصص مرعبة زي أن في أشباح بتطلع من تحت الأرض عشان تاكل الأطفال اللي مبيسمعوش كلام أمهم ومش بس كدة ده كمان قالتلهم أن البيت نفسه اللي أحنا عايشين فيه ساكنة فيه الأشباح دي وممكن تطلعلهم في أي وقت لو عملوا حاجة غلط أو مسمعوش الكلام ".

أبني بقي يجيله كوابيس ويصحي كل يوم بليل مفزوع 

وأختتم الزوج حديثه :" أبني بسبب حكاوي أمه بقي بيحلم بحاجات وحشة ويجيله كوابيس كل يوم بليل ويصحي مفزوع بسببها ويبقي مش عايز ياكل أو يشرب وده خلاني أهدد مراتي أنها لو مبطلتش تربي العيال بالشكل اللي يعقدهم ويرعبهم ده أنا هطلقها لكن هي مفرقش معاه وفضلت مستمرة علي اللي هي بتعمله لحد ما خدت كمان العيال وراحت بيهم عند أمها لمدة شهر وأنا عشان أرجعها البيت تاني وأأدبها رفعت عليها دعوي نشوز علي أمل أنها تتغير عشان أنا مش مستعد أن عيالي يطلعوا معقدين نفسيا بسبب أمهم ".