محمد يسري: مكنتش عايز حد يعرف بالجلطة.. ودا كان موقف أمير كرارة معايا

كشف الفنان الشاب محمد يسري عن تفاصيل إصابته بجلطة في القلب التي وقعت منذ عدة أسابيع، وأكد أنه لم يكن يود أن يعلم أحد بما حدث له ولكن الخبر تم تسريبه.

تحيا مصر يرصد أبرز تصريحات محمد يسري 

حيث قال محمد يسري في لقائه مع الإعلامي عمرو خليل في برنامج “من مصر”: “أنا مكنتش عايز الخبر يتعرف عشان مبحش فكرة أنه أخض حد، وأنا اتعاملت مع الموضوع لوحدي جدًا حتى مقولتش لحد لما حصل الموقف”.

وتابع قائلًا: “جاتلي جلطة في القلب بالشريان التاجي وكانت عاملة نسبة انسداد عالية أوي في الشريان، وكان لازم أخش أعمل قسطرة وأركب دعامة في التو واللحظة، ومقولتش لحد خالص، والخبر للأسف أتسرب بعد ما الموضوع خلص”.

وأضاف: “كان السبب الاقرب للواقع للجلطة هو ما بعد الكورونا، لأن أنا لما كورونا جاتلي مخدتش أدوية، ومعتمد دايما على أنه ربنا مديني شوية مناعة لطفية، والكورونا لما جاتلي جاتلي خفيفة أوي”.

محمد يسري وحب الناس

كما أوضح محمد يسري أنه لمس حب الناس له أثناء أزمته الصحية الأخيرة، حيث قال في برنامج “من مصر”: “من أكبر النعم اللي دايما بشوف أن الحمد لله ربنا مديها ليا هو حب الناس لإبراهيم يسري وحب الناس ليا، وأنا بحاول دايما أسيب بصمة مع الناس وبحمد ربنا عشان خلال المحنة دي الواحد من أكتر الحاجات اللي شافها بصراحة هو حب الناس”.

محمد يسري وأمير كرارة

ومن جانبه كشف محمد يسري أن من أبرز المكالمات التي تلقاها أثناء وعكته الصحية هي مكالمة النجم أمير كرارة، حيث قال محمد يسري: “في ناس كتيرة في الوسط الفني من اللي أعرفهم وفيه ما بيننا علاقة وفيهم اللي ما اعرفهمش خالص سألوا عليا، ومن المكالمات اللي كانت بالنسبالي فارقة معايا أوي لأنها كانت مكالمة حقيقية أوي كانت مكالمة من النجم أمير كرارة”.

وتابع قائلًا: “الحقيقة احنا عمرنا ما اتقابلنا ومشوفناش بعض ومشتغلناش مع بعض قبل كدا، لكنه جاب نمرتي وقعدنا نتكلم تقريبا نص ساعة ساعة إلا ربع”.