أحمد يونس يكشف تفاصيل تلقيه فاجعة موت نجل شقيقته على الهواء

يعيش الإعلامي أحمد يونس حاليًا فترة صعبة بعدما فقد نجل شقيقته الذي يبلغ من العمر 13 عامًا، إثر حادث أتوبيس مدرسي في التجمع الخامس، خلال الأيام القليلة الماضية.

نشر يونس صورة لمصطفى نجل شقيقته، عبر صفحته على موقع التواصل الاجتماعي "فيس بوك"، وسرد كواليس تلقيه الفاجعة على الهواء أثناء تقديم برنامجه الصباحي، قائلًا: "يوم وفاة ابن أختي ١٢ أكتوبر الحزين الصبح كنت في برنامجي الصباحي على الراديو ودايما بيكون عندي تقرير مروري فإذا بي أتبلغ بحادث مروري في التجمع الخامس بين أتوبيس مدرسة وأتوبيس رحلات وتسبب في وفاة طفل ١٣ سنة والباقي إصابات، قلبي وجعني على أم وأبو الطفل وقولت بالحرف يا قهرتهم على ضناهم".

وتابع: "وطلعت من الاستوديو أتاكد من كل زمايلي أن ولادهم وصلوا مدارسهم بسلامة الله فاتطمنت الحمد لله ورجعت الاستوديو أكمل شغلي كانت الساعه ٨:١٠ الصبح فإذا بي أتلقى مكالمة تليفونية من أخويا الكبير بيقولي مصيبة يا أحمد مصيبة كل توقعي إنه هيقولي أمك ماتت..لكن لقيته بيقولي مصطفى ابن أختك سماح مات في حادثة أتوبيس مدرسة".

أضاف الاعلامي أحمد يونس: "الجملة نزلت علي صعقتتي في كل جسمي قفلت السكة في وشة وفضلت أقوم وأقعد زي المجنون وأنا مش مدرك اللي سمعته وعمال أقول لا ده أكيد كابوس وهصحى منه أروح الشغل عادي سيبت اليرنامج ونزلت أجري وأنا مش عارف اعمل ايه ولا اتصرف ازاي لحد ما روحت ولاقيت الكل موجود عند تلاجه الموتى..ولاقيت اختي سماح في ثبات وتماسك ومفيش على لسانها غير راضيه يارب انا لله وانا اليه راجعون الحمد لله اللهم اجرني في مصيبتي وبقت تسكتني وحواليها صحبه من صديقاتها اللي بدعي لهم ربنا يكرمهم زي ما اكرموها وسندوها لحد يومنا هذا .. ونعم الصحبه بجد".

واستطرد حديثه: "لاقيت حازم والد حبيبي مصطفى في صمت وذهول عمري ما هنساه وهنا كل اللي مر عباره عن شريط اسود مفيهوش نقطه بيضا لحد ما ربنا كرمني اني غسلته بنفسي واتطمنت عليه وخدته في حضني احن حضن في حياتي كلها انا عمري ما كنت متخيل اني اغطي حادث وفاة طفل واكتشف انه ابن اختي "ابني وصاحبي وحبيبي".

اقرأ أيضًا..أحمد يونس عن نجل شقيقته: "كان فاضله سورتين ويختم حفظ القرآن"

اختتم: "عمري ما كنت متخيل ان الحوادث اللي بنسمع عنها وارد نمر بيها حق ابننا مصطفى لن يضيع واذا ابوه وامه سكتوا عنه بسبب الفاجعه اللي هم فيه انا مش هسكت عنه، عارف انه ابننا مش هيرجع بس ع الاقل حبيبي يكون سبب في وجود شوية ضمير عند معدومي الضمير احضنوا اطفالكم ومتزعلوهمش واسمعوهم وادعوا دايما ان ربنا ينجيهم من شر الحوادث والفواجع وادعوا لام مصطفى وابوه ولنا ولكل ام فقدت طفلها بالصبر مع السلامه يا حبيبي".