هالة صدقي: شاركت في جعفر العمدة لأنه وحشني اللون الشعبي وكان نفسي اشتغل مع محمد سامي.. بخاف على محمد رمضان وهو بيسمع النصيحة.. معرفش مين ياسمين عز وسعيدة بعودة خالد يوسف| حوار

صفصف.. واحدة من الشخصيات التي ستُصبح ماركة مسجلة في تاريخ الدراما الشعبية، نجحت الفنانة الكبيرة هالة صدقي في السيطرة على الموسم الرمضاني الجاري 2023 واقتحام قلوب المشاهدين بقوة شخصيتها وخفة دمها ونرجسيتها في مسلسل جعفر العمدة فهي تركيبة تجعل الجمهور يخاف منها تارة ويضحك بسببها تارة أخرى.

لذا حاورها تحيا مصر للكشف عن كواليس مشاركتها في مسلسل جعفر العمدة وتحضيرها للشخصية.. وإلى نص الحوار:

كيف جاء ترشيحك لمسلسل جعفر العمدة؟

الترشيح جه من أستاذ محمد سامي قبل ما يكتب الفكرة كانت عنده كلمني، قالي الفكرة وايه رايك تبقي معايا.. وافقت طبعًا علطول لأن محمد سامي كان نفسي اشتغل معاه فهو مخرج متميز كل الممثلين معاه بيبقوا في أحسن حالتهم.

وما الذي جذبك للدور؟

اللي شدني اعمل شخصية صفصف في جعفر العمدة أن اللون الشعبي أنا بعيدة عنه من أيام ارابيسك وكان واحشني وحابة ارجعله تاني.

صفصف شخصية مليئة بالتفاصيل.. فكيف حضرتي لها؟

عندي صاحبة من طبقة راقية جدًا بس هي نفس الشخصية دي، نرجسية وصوتها عالي علطول.. لسانها علطول مش مربوط.

ما هي أكثر المشاهد صعوبة في تصويرها؟

في مشاهد كتير صعبة زي مشهد الخناقة في الحارة، ومشهد بين ولادي الاتنين، ومشهد أنا وابني احاسيسه صعبة شوية.

بعيدًا عن تعاونك مع محمد رمضان في المسلسل.. فالجمهور يرى علاقتكما على السوشيال ميديا .. حدثينا عنها

الكيمياء حلوة بينا أنا ومحمد رمضان وأنا فعلًا بحبه وبخاف عليه، وهو إنسان طيب وبيسمع النصيحة وبيسمع كلمة أي حد وبيطيب خاطر أي حد محتاج.. عنده حاجات إنسانية جميلة مش باينة للناس.

وقع هجوم واسع على محمد رمضان خلال الفترة الماضية.. فمن وجهة نظرك ما السر وراء؟

الناس بتهاجمه عشان مش بيبن جانبه الإنساني في الميديا يمكن دا غلط، هو شايف أنه الميديا لها أسلوب أو شكل معين.

لم تتردي في المشاركة في مسلسل سره الباتع كضيفة شرف.. فما الذي شجعك؟

مسلسل كبير وتاريخي وأنا بحب التاريخ، وسعيدة بعودة مخرج متمكن من أدواته للشاشة وأول تجربة لخالد يوسف في التليفزيون.. فمؤكد أنه هيعمل مجهود كبير عشان يقدر يأكد نفسه، في أسباب كتير لمشاركتي فهو من إنتاج أهم شركة في مصر كل المعطيات موجودة وتشجعني على المسلسل.

ما رأيك في برامج المقالب كبرنامج رامز نيفر إند؟

الناس بتحب تتفرج عليه وما دام ناجح لازم ينعاد، وبيحقق نسب مشاهدة عالية وهي مسألة عرض وطلب اللي بيرضى بيتعرض.

هناك جدل مثار حول الإعلامية ياسمين عز ومحتواها عن الرجل.. فما رأيك فيما تقدمه؟

معرفش مين ياسمين عز

وكيف وجدتي ردود الأفعال على مسلسل جعفر؟

الحمدلله في اكتساح السنة دي

دور تتمني تقديمه؟

معملتش صعيدي أبدًا فنفسي اعمل صعيدي أكيد

هل تترددي في الظهور كضيفة شرف؟

لا لأني  خلاص كونت اسمي ووجودي، لما يبقى في عمل مهم كويس ان اكون ضيفة شرف فيه مبيبقاش دور تافه يعني.. وممكن اخد عليه عليه جايزة المهم العمل ميكونش تافه.