عمرو الديب يكتب:"فتحى مبروك" لازم يرحل..ده مش وقت مدرب"سد" خانة".."علشان محمود طاهرمش عايزه"..غالى لاعب اقوى من مدربه.. فشل فى ابعاد"مزز"الاهلى عن احمد الشيخ.. معرفش يمنع حسين السيد من الـ"تف"

"مبروك لازم يرحل" ، الجملة دى اصبحت لسان حال كل الأهلاوية ، بعدالخسائر المتتالية للمارد الاحمر ، تحت قيادة الكابتن فتحى مبروك المدير الفنى للنادى الاهلى.

نتكلم  بصراحة شوية ، مبروك ممكن يكون مدير فنى نستعين به فى وقت الأزمات ، اللى هى بتكون فى فترة تغيير المدربين ، فبدلاً من ان يظل الفريق بدون مدرب "نجيب فتحى يسد خانة"، لكن فكرة انه يكون العقل المفكر اللى بيحرك الأهلى ، اعتقد صعب جداً.

فتحى مبروك راجل باين على شكله انه طيب ، وشخصيته ضعيفة ومش هيقدر على اللاعيبه ، يعنى مش هيقدر مثلاً انه يعاقب حسام غالى ويجبره انه يحلق شعره، زى ماعمل مرتضى منصور مع باسم مرسى ، مش هيقدر يخلى حسين السيد يبطل "تف" على خلق الله ، مش هيقدر يسيطر على انانية رمضان صبحى ، مش هيقدر يبعد احمد الشيخ عن "مزز" الاهلى.

حاجات كتير ميقدرش يعملها فتحى مبروك ، اولاً لانه راجل طيب ، ثانياً وده الأهم ان مجلس الادارة برئاسة محمود طاهر غير راضيين عن فتحى مبروك ، وعينوه مدير فنى علشان يخلصوا عليه امام جماهير الاهلى التى طالبت بتعيينه مديراً فنياً للاهلى بعد رحيل جاريدو وتحقيق مبروك بعض الانتصارات فى الدورى.

محمود طاهر ومجلس ادارة الاهلى، عملوا مع فتحى مبروك، زى ماعمل الراحل الملك "حسين" ملك الاردن السابق ، لما جاب الاخوان ومسكهم مناصب قيادية فى الدولة وفشلوا، فكشفهم امام الشعب ، ونجح فى القضاء على اسطورة الأخوان للنهاية فى الاردن.

فتحى مبروك لازم يرحل ، لانه ضعيف ، لازم يرحل لان مجلس الادارة مش بيسانده ، لازم يرحل لان الاهلى كبير عليه.