تحليل وتقييم فيلم الفيل الأزرق 2 وأداء أبطاله

نشرت صفحة بحب السيما على موقع التواصل الاجتماعي "فيس بوك"، تحليلا وتقييما لفيلم الفيل الأزرق 2 وأداء الأبطال الذين ظهروا في الفيلم.

وكتبت الصفحة في التقييم: "كنت متشوق اشوف فيلم الفيل الازرق ٢ خصوصا انه منزلش ليه روايه و عشان كده التشويق اني معرفش اي تفاصيل عن القصه هيكون اكتر و كمان عشان المخرج مروان حامد اللي انا بعتبره من افضل المخرجين السينمائيين علي الساحه دلوقتي ان مكانش افضلهم من حيث الصوره و الكادرات، ودخلت الفيلم و انبهرت من اول لحظه بكل عناصر الفيلم اللي هنتكلم عليها بالتفصيل في النقط الجاية".

وأضافت: "أول حاجه شدتني في الفيلم طبعا الموسيقي لهشام نزيه اللي بتكمل التيمه بتاعه الجزء الأول وبتضيف ليها تراكات تعيشك في جو الغموض والرعب وتحس انها اتالفت مع نفس تراكات الجزء الأول مش بعدها بكام سنة، تاني حاجة الكاست كريم عبد العزيز فعلا نضج ومختلف عن أي دور عمله قبل كده غير الفيل الازرق الجزء الأول بيكمل تألقه عن الجزء الأول وبيثبت أنه مش بس ممثل كوميدي ودمه خفيف، لا ممثل تقيل وأن تمثيل الجزء الأول مجاش بس من تعليمات المخرج لا من جواه هو كممثل".

وتابعت: "تاني شخصية معانا هند صبري واللي كان اختيارها موفق جدا أنها تشيل البطوله قدام كريم وفعلا كانت مشاهدهم سوا عاليه جدا، تالت شخصية معانا نيللي كريم ونجحت فانها تنقل التطورات في شخصيه لبنى مع الأحداث الجديدة اللي حصلت في الجزء التاني، رابع شخصية معانا إياد نصار وأنا شفت إنه اتظلم باختياره للدور ده عشان حجم الدور وخلفية الشخصية اللي مديتلهوش فرصه يبين تألقه كممثل بالعكس كانت بتضره كل ما يظهر في مشهد".

وأضافت: "القصة لأحمد مراد كانت ناجحة أنها تكمل مع تعقيدات الجزء الأول وتطور الشخصيات فيها مع بعض التحفظات علي الداعي الدرامي لاستعمال الفيل الأزرق واللي كنت شايف إنها مالهاش داعي خالص في القصة هنا، والتصوير كان مختلف زي كل أفلام مروان حامد مع كادرات الرعب اللي وصلت لمستوى اي فيلم رعب عالمي، أنا حسيت في بعض المشاهد اني بتفرج علي فيلم conjuring، ونيجي بقي للإخراج مروان حامد و ما ادراك من هو مروان حامد. نقدر نقول ان المخرج ده معاه شهاده نجاح لأي منتج هو بيشتغل فيه ودا بيبنى ثقه مع جمهوره الي عمره ما خذلهم في اي فيلم عمله. هنا في فيلمنا كمان بيعلي علي نفسه وعلى شغله اللي عمله في الجزء الأول بمراحل مع بعض التحفظات في الجرافيك اللي ربنا يكرمنا و يقرب من الأفلام العالميه قريب إن شاء الله. غير كده انت قدام فيلم عالمي بكل ما تحمل الكلمه من معني، وفي الاخر احب اقول ان فيلم الفيل الازرق ٢ فيلم رعب بجد و ياخد (٨.٥/١٠) و بلاش حد ياخد اي أطفال معاه في السينما عشان في مشاهد صعبه عالكبار نفسهم".