رامى جمال يعلن اصابته بمرض البهاق ونيته للإعتزال: الناس بتخاف تسلم عليا

أعلن الفنان الشاب رامى جمال خلال حسابه الشخصى على موقع الانستجرام، اصابته بمرض البهاق ونيته الاعتزال عن الغناء نتيجة اصابته بهذا المرض، وأكد قائلا: "الحمد لله الذى أحبنى فابتلانى وأقدرنى على الصبر،من فترة ظهرت بقع بيضا فى جسمى وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة".

وأضاف رامى جمال:رضيت وسلمت أمرى لله عشان عرفت إن الزعل بيزوده وكفاية شغلانتى وصعوبتها والقلق الدائم من المستقبل، وفعلا بقى بيزيد لدرجة لفتت نظر ناس كتير، اللى بقى يقوللى هتتعامل إزاى وأنت فنان واللى يخاف يسلم عليا واللى يسألنى هو ده معدى".

وأضاف: "أنا بقالى سنة فعلا لو عندى حفلة أو تصوير بتعب على ما أشوف طريقة أخفيه بيها، لدرجة خلت ناس تقولى شوف بيزنس تانى اعمله عشان الناس مش هتقبلك كدة، وفكرت فى كلامهم بصراحة".

واختتم رسالته لجمهوره: "لقيت إن عندى حلين فعلا شكرا لحد كدة على الشغلانة دى رغم حبى ليها وعدم معرفتى بغيرها، يا إما مش هداريه تانى وتقبلونى بيه وترحموا كل اللى ربنا ابتلاهم بيه من نظرة أن شكله غريب، والحمد لله على نعمة الأهل لانهم الوحيدين اللى بيقبلوا الواحد زى ما هو".