عاجل
الأحد 27 نوفمبر 2022 الموافق 03 جمادى الأولى 1444
رئيس التحرير
عمرو الديب

دوري في راجعين يا هوا جالي بالصدفة والناس شايفاني كوميديانة.. تصريحات ريهام الشنواني

ريهام الشنواني
ريهام الشنواني

حلت الفنانة الشابه ريهام الشنواني ضيفة إحدى فقرات حلقة اليوم من برنامج صاحبة السعادة، مع الإعلامية إسعاد يونس وتحدثت عن مشاركتها في مسلسل راجعين يا هوا والعديد من الأسرار الأخرى.

تحيا مصر يرصد لكم تصريحات ريهام الشنواني في صاحبة السعادة

ريهام الشنواني في مسلسل راجعين يا هوا

فقالت ريهام الشنواني عن دورها في راجعين يا هوا: جالي بطريق الصدفة وكنت رايحه مع واحد زميلي وبياخد باقي أجره، ساعتها كنا نازلين عشان مضايقة وقالي تعالي هأكلك مكرونة، وصمم انزل من العربية لما وصلنا واروح معاه وكنا في طلعة الاستاذ محمد سلامة.

وتابعت: وقتها كنت بطلع الموبايل راحت الشنطة واقعة، وقالولي استاذ محمد سلامة عايزك وروحتله وقالي أنا عارفك وشوفتك في مركز الإبداع، وعندي دور عزة والبنت اللي كانت هتعمله اعتذرت، ومضيت على الدور وخدته.

ريهام الشنواني مضيفة جوية 

وتحدثت عن مهنتها الأصلية، قائلة: شغاله في شركة طيران جوي كمضيفة، وعرفت ان استاذ خالد جلال عامل ورشة فقدمت فيها ومشيت وبعدها بـ 10 أيام حد كلمني، وساعتها كنت عاملة إعلان كان تريند، قولت أكيد شافه، ولما روحتله قالي لا مشوفتوش أنا عايز اعرف مين اللي بتضحك أوي زي الكرتون دي.

وعن المواقف الطريفة التي تعرضت لها في عملها، قالت: إن واحدة بتطلع بتقولي فين الحج أبو محمد، قولتلها معرفش والله، راحت قالتلي مش هقدر اركب من غير أبو محمد فـ فضلت أنادي “يا حج أبو محمد" أنت فين.

ريهام الشنواني عاشقة زينات صدقي 

وعن تقديمها دور زينات صدقي سابقًا، قالت: كنت بحب زينات صدقي، وقولتله يا أستاذ خالد عايزة اعمل دور زينات، فـ قالي ازاي الشكل ده يعمل زينات! وعملت المشاهد كنوع من أنواع المساعدة لصديق ليا ووقتها لما الناس ضحكت قالي خلاص هتعمليه، وبحب دور زلابية جدًا.

صعوبات واجهت ريهام الشنواني 

وعن الصعوبات التي واجهت ريهام الشنواني في مسلسل راجعين يا هوا، قالت: كنت إني اعيط واجيب الاحساس من ناحية شخصية عزة، كنت خايفة وقتها جدًا وأنا بعمل المشهد ده، وكان الماستر سين بتاعي، ومقدرش انساه.

وعن أفضل مشاهدها، قالت: في مسلسل دايمًا عامر كنت بحب مشاهد الغردقة مع الفنانة سما ابراهيم، ولما مشيت على الحبل كنت خايفة اقع بجد.

وعن أحلامها قالت: الناس شايفاني في الكوميدي، بس انا عندي حاجات تانية، واتمنى ابقى ممثلة شاطرة والناس تحبني، المهم الناس تشوفني شاطرة.

تابع موقع تحيا مصر علي