المطرب الصعيدي علاء أبو الريش: قررت اتجنن وأعمل تريند شقلب وأقلب وهتحدى أنتش وأجري

أعلن المطرب الصعيدي علاء أبو الريش الذي أثار الجدل مؤخرًا بعدما طلب الزواج من الفنانة سمية الخشاب أنه سيخرج عن المألوف وسيتحدى تريند أنتش وأجري ويصنع تريند أخر تحت اسم "شقلب وأقلب".

تحيا مصر يكشف تصريحات علاء أبو الريش

حيث قال المطرب الصعيدي علاء أبو الريش في تصريحات خاصة لـ موقع تحيا مصر: "لمجرد واحد يطلع على السطوح لابس تيشيرت وبيطبل على صدره أنتش واجري انتش واجري دا يعلم الناس السرقة، وأنا بصراحة ذهلت واتجننت وبقى تريند على جميع مواقع التواصل الاجتماعي وللاسف لقيت ممثلين والنجوم في مصر بيدعموه وعملوله لقاءات على قنوات التلفزيون وسمعنا ان فيه شركة اتصالات عملت تعاقد معاه ب 420 الف جنيه".

تحدي "شقلب وأقلب"

وتابع علاء أبو الريش حديثه قائلًا: "واحنا اللي بنغني لينا سنين مفيش حد قابلنا على الكوبري أو على الطريق وقف معانا يسقينا شاي وقولت لا مبدهاش أنا خلاص هطلع عن المألوف وهتجنن كدا وهعمل أغنية.. هو يعمل انتش واجري وأنا هعمله شقلب وأقلب، وخلاص أنا مش هغني تاني هبطل غنا".

وأضاف علاء أبو الريش: "طالما أنتش واجري بقيت تريند خلاص أنا هعمل شقلب واقلب، وعملت بوست على صفحتي على الفيس بوك اني انا بتحدى تريند انتش واجري بأغنية شقلب وأقلب".

مبادرة "ساعد ابن بلدك"

ومن ناحية أخرى، كشف المطرب الصعيدي علاء أبو الريش عن تفاصيل تريند مبادرة ساعد ابن بلدك، حيث قال لـ تحيا مصر: “موضوع النقطة والجمعيات مش وليدة اللحظة، دا موضوع كبير ومنتشر في جميع المحافظات وكان فيه فيلم الفرح قبل كدا وكانوا فيه عاملين جمعية عشان يساعدوا صاحب الفرح”.

واستطرد: "يمكن الموضوع طلع تريند على المواقع والتلفزيون المصري ان احنا في قرية بسيطة نجمع نص مليون جنيه، والفرح دا بالذات كان فيه كمية دعاوي رهيبة لان العرس إنسان بسيط غلبان ومحب وكل الناس بتحبه فكلهم بقوا ينقطوا اللي بألف واللي باتنين واللي بخمسة واللي بتلاتة وعملوله عقد بالفلوس مكنش ظاهر فيه غير وشه".

وتابع: "وعملناها كمساعدة للعريس انا بنقط وكلنا بنقط، والفلوس بدل ما يخدها المطرب ويمشي أو حد ياخدها تاني ويمشي، بتتجمع وبيتكتب في دفتر وبتتسلم للعريس مساعدة ليه في حياته اليومية اذا كان عليه قسط بتساعد معاه وبقيت تريند والحمد لله بقيت مبادرة وسمنيها مبادرة ساعد ابن بلدك".