حسام حبيب: شيرين عبد الوهاب حاولت الانتحار في المستشفى وأخوها كان عايز يحجر على فلوسها

كشف الفنان حسام حبيب عن محاولة الفنانة شيرين عبد الوهاب في المستشفى التي احتجزت بها الفنانة، مشيرا إلى أنها كانت ترفض الأكل لمدة 3 أيام وكان على ظهرها أثار الضرب.

تحيا مصر يرصد في ذلك التقرير تصريحات حسام حبيب في برنامج الحكاية

حسام حبيب: أخوها قالي هحجر عليها وهسحب فلوسها

وقال حسام حبيب خلال برنامج الحكاية، المذاع على قناة mbc مصر ويقدمه الإعلامي عمرو أديب: “اللي دمر شيرين هو اللي عايز يحجر عليها، وقالي هسحب فلوسها كلها وروحت وقتها لـ شيرين وقولتها لازم تفتحي حسابك وتأمني بناتك وعملتها وصية برة وعندها فلوس لبناتها برة ودي مفاجئة ليهم من دلوقتي”.

وتابع حسام حبيب حديثه: “شيرين عبد الوهاب حاولت الانتحار في المستشفى، وكانت رافضة الأكل لمدة 3 أيام وعلى ضهرها أثار ضرب”.

حسام حبيب: كنت باخد منوم عشان أقدر انسى الليلة اللي اتضرب فيها شيرين

واستكمل: “سارة الطباخ أما كلمتني عشان تطمن على شيرين قولتها هي مش كويسة خالص ومحتجزة في المستشفى، وهي كلمت اللي المفروض خصيمي المحامي بتاع شيرين واتصل بيا عشان يساعدني، أنا كنت قاعد بعيط قدام المستشفى، والليلة اللي اتضرب فيها شيرين مكنتش قادر أنام وكنت باخد منومات لـ 4 أيام".

حسام حبيب يكشف تفاصيل تعدي شقيقها عليها

وكان قد روى حسام حبيب تفاصيل تعدي شقيق شيرين عبد الوهاب عليها، فقال: “أخو شيرين عبد الوهاب مكنش بيكلمها، أنا لقيت فجأة ناس داخلة علينا بمطاوي، وأول مرة أشوف دكاترة معاهم مطاوي، واكتشفت انه كان جايب صحابه، شوفتها وهي بتتسحب في شعرها ونازلة حافية ببجامة، وبتجري بالعربية وبتقولي الحقني".

وتابع حسام حبيب حديثه، قائلا: "كان تلت تربع الكلام شتايم وتهديد، وكانت بتقعد تقوله انا أخت اللي عالجت تعمل فيا كدة، أنا اللي ربيتك وكبرت، وكانت بتقولي الحقني، وأنا اتضربت وايدي مشروخة، وكنت هرفع عليهم محضر بس خوفت من الفضيحة".

واستكمل: “نص ساعة قتال، وأخدوا تليفوناتنا، وكانوا ناس داخلين عارفين هما بيعملوا اي، وشوفت منظر عمري ما هعرف أنساه طول حياتي، وأنا بقى عندي عقدة، مش شيرين عبد الوهاب اللي يتعمل فيها كدة، وفي واحدة هي اللي كانت عارفة اني جوة وهي اللي أخدت من شيرين المفتاح والموضوع كان مرتب”.