الفايف عن قرارات النقابة بضرورة الفرقة الموسيقية: المفروض العزفين ميزدوش عن 5.. ولازم يتعمل جزء للموسيقى الحديثة يديره شاب

علق مغني الراب الفايف على قرارات النقابة الأخيرة بإلزام كل شعبة الراب، الإعتماد على فرقة موسيقية أثناء تأدية أغانيهم، وذلك عبر خاصية ستوري بحسابه الرسمي عبر موقع انستجرام.

تحيا مصر يرصد لكم تعليق الفايف على تصريحات النقابة الجديدة بشأن الفرقة الموسيقية 

الفايف: المفروض العازفين ميزدوش عن 5 أشخاص 

وكتب الفايف عبر حسابه الرسمي بموقع انستجرام: تعليقي على قرارات النقابة.. الموضوع لو هيكون فيه عازفين اصلًا المفروض ميزدوش عن 5 أشخاص، المزيكا الأورجينال لازم تكون شغالة من الديجي و الموسيقيين يعزفوا عليها زي ما بيحصل في العالم كله لو فيه عازفين علشان ايقاع الراب مش حر وأي غلطة الأغنية باظت. 

وتابع الفايف: لو القرار بقى طالع اصلًا علشان الموسيقيين يشتغلوا فممكن تخصص جزء من أجر الفنان كل حفلة علشان معاشات الناس دي، وتفضل فاتحة بيوتها أنا مش ضده ده، بس ضد إني أكون ملزم بعازفين مش فاهمين نوع مزيكتي، مش تقليل منهم لكن دي الحقيقة. 

الفايف: يا ريت النقابة تعمل جزء للموسيقى الحديثة 

وأضاف الفايف: حاجة اخيرة يا ريت يبقى عندنا في النقابة جزء للموسيقى الحديثة بكل أنواعها  ويبقى حد بيدير ده جوا شاب متطلع وفاهم ايه اللي بيحصل في 2022.

واستكمل الفايف كلامه: الراب في مصد بدء مشواره الحقيقي 2018 يعني بقاله بتاع 4 سنين بس، وأهم واحد واكتر واحد بيبيع دلوقتي الراب سين في مصر، معملش 50 حفلة على بعض يعني tour لفنان في أمريكا في شهر او شهر ونص لسه الراب في مصر ناقصة خبرات كتير.. فـ لازم ناخد ده بعين الاعتبار قبل ما ناخد أي قرار الراب طور المزيكا في مصر، حطها على الخريطة في الموسيقى العالمية بعد سنين عجاف سيئة للموسيقى في مصر، فـ لازم نحافظ على المواهب دي علشان تقدر تستمر وتطور.

واختتم الفايف: غير إن في ناس كتير أصلًا كمان مش هتقدر تتحمل نفقات الموسيقيين دول، مش كل الرابرز بتاخد مبالغ كبيرة ف الحفلات تقدر تجيب 12 عازف ببروفات وشغل وخلافه.. أتمنى القرار يتراجع.