مصطفى كامل عن الموسيقار محمد سلطان: كان رمز للفن.. وبعذر اللي محضرش

تحدث نقيب المهن الموسيقية الفنان مصطفى كامل عن الموسيقار الراحل محمد سلطان، وذلك بعد تأدية واجب العزاء لعائلة الفقيد. 

تحيا مصر يرصد لكم كلمات مصطفى كامل عن الراحل محمد سلطان

مصطفى كامل: الموسيقار محمد سلطان كان رمز للفن 

وقال النقيب لـ تحيا مصر: كان رمز كبير للفن المصري، وهو ده حال الدنيا وكلنا لها. 

وبشأن البيان الذي تم إصداره قبل ساعات، قال: البيان اللي خرج كنا بنناشد الزملاء الفنانين، واحنا كلنا رايحين لده آجلًا أو عاجلًا، ولقاء ربنا هو الحقيقة الوحيدة في الحياة، وكنت بناشد جموع الفنانين خاصة اللي اكتشفهم الراحل محمد سلطان، وزي ما شوفنا الاستاذ محمد ثروت والأستاذ هاني شاكر، والفنانة نادية مصطفى اللي هما الاكتشافات اللي اكتشفها الراحل، والفنانة أنوشكا طبعًا. 

واختتم مصطفى كامل: والعزاء واجب وبنعذر كل الفنانين اللي مجتش.

هاني شاكر ينعي محمد سلطان 

وكان قد حرص الفنان هاني شاكر على نعي الموسيقار الراحل محمد سلطان بكلمات مؤثرة، وذلك على هامش عزاءه، الذي أقيم اليوم في مسجد الحامدية الشاذلية بحضور عدد قليل من نجوم الفن.

قال هاني شاكر في تصريح خاص لـ موقع تحيا مصر، ناعيا الموسيقار محمد سلطان: “فنان كتير افتقدناه، وربنا يعوضنا عنه خير ويرحمه ويدخله فسيح جناته، والحقيقة هو سابلنا تراث كبير نفتكره بيه وعايش في وجدنا لحد النهاردة، ربنا يرحمه ويديله على قد حبنا ليه، وقد ما كان ملاك ماشي على الأرض، عمري ما شوفته بيغلط في حد او بيتكلم على حد وحش، وهو انسان في صورة ملاك قاعد وسطينا”.

وعن اخر تواصل بينه وبين الراحل، قال هاني شاكر:أخر تواصل  بيني وبينه من شهر، واتقابلنا في مكان بالصدفة ووقتها مكنتش عارف ممكن اشوفه تاني ولا لا ربنا يرحمه.

اللحظات الأخيرة في حياة محمد سلطان 

وكشفت الفنانة نادية مصطفى أخر لحظات في حياة محمد سلطان، فقال: “ميت بدون أمراض، واستغرب من الكلمة دي، واحنا ديما بنقعد نتكلم في حاجات كتير كان بيقعد يتأمل الأيات ويشرحلي فيها ويقولي أدعية كتير ويقولي احفظيها”.

وتابعت: مديرة أعماله بعتتلي مسيدج على الواتساب انه توفى وخبر زي ده نزل عليا زي الصاعقة هو حاجات كتير جدا بالنسبالي، هو كان عارف ان نادية هتتصرف بس مكنتش موجودة، مصطفى كامل نزل هو والمجلس كله للمستشفى اللي راح فيها.