وفاء السيد تشوق الجمهور لأعمالها الجديدة: بعمل حاجة دينية وهذه تفاصيلها

تحدثت الفنانة وفاء السيد عن أعمالها القادمة، وفكرة حصرها في الأدوار الكوميدية، وذلك خلال حوارها ببرنامج مساء dmc. 

تحيا مصر يرصد لكم تصريحات وفاء السيد في برنامج مساء dmc

وقالت وفاء السيد: وانا في الجامعة كنت بعمل ادوار تراچيدي، انا معايا ليسانس اداب قسم مسرح، وواخدة ممثلة أولى جمهورية جامعات على حلم الصيف وكنت بعمل بدور تراچيدي، مفيش كوميدي خالص. 

وتابعت: ولما جيت القاهرة عملت أول حاجة اللي هو الف ليلة وليلة، وحجموني في الأدوار دي ومعرفتش اطلع منها، مع ان التراچيدي سهل بس هما مش مقتنعين بكده، شايفني كوميديانة بس عشان الكوميديا أصعب إن أضحّك، ونفسي اعمل تراچيدي. 

وفاء السيد: بحب اللغة العربية 

وأضافت وفاء السيد: بحب اللغة العربية الفصحى، وبعمل دلوقتي مسرحية مع مداح الرسول الدكتور أحمد الكحلاوي، وهي اجتماعية بس فيها ديني ومدخلين احاديث عن الرسول عليه الصلاة والسلام، واسمها حارة الطيبين.

وفاء السيد عن تفاصيل دورها في حسن ومرقص 

وقالت وفاء السيد عن تفاصيل شخصيتها في فيلم حسن ومرقص: عملت في حسن ومرقص البنت اللي ممكن تتجوز وان في عريس قدامها اللي هو الاستاذ محمد إمام بس هي فيها ديفوهات يعني، لكنه من الأدوار اللي محببة إلى قلبي وساب علامة مع الجمهور. 

وتابعت: وكل الأدوار أو معظمها بتبقى في الكتابة حاجة ولما بتشوفوها بتبقى حاجة تانية، وبقعد اركز واهتم بالدور وبالحب مع المخرج ونجم العمل اللي بيسيب مساحة فـ الحمد لله بيوصل الحب ده للجمهور وبتثبت الشخصية.

واختتمت: بقعد افكر وببقى مهمومة إن أنا اوصل للحالة فـ ببدأ افكر في الشكل الخارجي والداخلي وبعدين لو هعملها ديفوه أو لازمة في الكلام، في الماشية، في الحركة والملابس، والمكياج وطريقة الشعر، والسنان ممكن نشوه فيها وببقى مهتمة جدًا والحمد لله بمساعدة المخرج بنوصل لحاجة جميلة.

أخر تصريحات وفاء السيد 

وكانت قد حلت الفنانة وفاء السيد ضيفة الفنانة نشوى مصطفى، برنامج بنت البلد، المذاع على قناة صدى البلد، وكشفت عن سر غيابها عن الفن لمدة 15 عام، كما صرحت بعد التصريحات القوية.

- غبت فترة بعد آخر عمل ليا كان مع الزعيم عادل إمام

- بعد ما عملت الفيلم معرفش إيه اللي حصل بدل ما اشتغل قعدت في بيتنا