عاجل
الجمعة 03 فبراير 2023 الموافق 12 رجب 1444
رئيس التحرير
عمرو الديب

هيام تطلب الخلع : جوزي بيحسدني علي مرتبي وأهلي حذروني وقالولي عينه وحشة

سيدة - ارشيفية
سيدة - ارشيفية

جوزي بيبصلي في كل حاجة وبتنتهي علي خراب.. بتلك الكلمات روت هيام لتحيا مصر من داخل محكمة الأسرة عن زوجها ذو الطبع الحسود والتي اصبحت متضررة منه بسبب غيرته منها علي أبسط الأمور فقررت الانفصال عنه رسميا برفع عليه دعوي خلع بمحكمة الأسرة بالكيت كات .

أنا مديرة وجوزي موظف بس حبينا بعض 

بدأت هيام حديثها لـ تحيا مصر :" أنا مديرة علاقات عامة في شركة أتصالات وجوزي مدرس ألعاب في مدرسة أتعرفنا علي بعض لما كنت بزور بنت أختي في مدرستها وحبينا بعض من ساعتها وبعد مرور شهور من تعارفنا قررنا نتجوز لكنه لما زارنا أول مرة مع عيلته عشان يطلب أيدي للجواز والدتي حذرتني منه كتير وقالتلي  يا بنتي ده من ساعة ما دخل شقتنا وهو بيتفرج عليها أكنه دخل متحف وشكله كدة هيغلبك بعد الجواز وهيبص للي في أيدك أنا مش مرتحاله " وأنا بالرغم من أني كنت عارفة أنه عاش فى ظروف أقل من اللي أنا عيشت فيها بس كنت بحبه وشارياه ومهمنيش كلام حد ".

جوزي بقي بيحسدني علي مرتبي وعلي حب الناس ليا 

وتابعت هيام حديثها :" بعد الجواز جوزي بان علي حقيقته وأكتشفت أن كلام أهلي كله صح لما أتضحلي أنه مبيفرحليش بأي نجاح احققه في شغلي وده ظهر لما في مرة حكيتله وأنا فرحانة أن مرتبي زاد في الشغل وده ناتج عن مجهودي ولقيته سكت ومردش حتي عليا ولقيت بعدها بيومين حصلتلي مشكلة كبيرة في الشغل لدرجة أني كنت هترفد من وقتها وأنا بخاف منه وبخاف احكيله علي اي حاجة مفرحاني أحسن تبوظ ده غير أنه كان دايما يقولي " يا بختك عندك صحاب وأنا معنديش " لأني بطبعي أجتماعية وبحب أكون علاقات وهو هادي بطبعه ويكاد يكون أنطوائي وحتي في دي كمان الاقي نفسي بعد كلامه بتحصل بيني وبين صحابي خلافات ومشاكل كبيرة بتوصل للخصام وكل ده بسبب عينه الوحشة ". 

تليفوني الجديد اتكسر أول ما جوزي شافه 

وأختتمت هيام حديثها :" جوزي في الفترة الأخيرة كنت بحاول أتجاهل طبعه الحسود عشان الحياة بيننا تكمل لحد ما حصل بيننا موقف من ساعتها وأنا قررت أنفصل عنه كنت شارية تليفون جديد وكان نفسي فيه وأول ما جوزي شافه وقع أتكسر مني وبقي 100 حتة حزنت عليه وعلي الفلوس اللي صرفتها عليه واترمت في الأرض وحزنت أكتر أني بقيت حاسة أني عايشة مع راجل حقود رغم أني عمري ما حرمته من حاجة وكنت دايما كريمة معاه بالرغم من أنا الست وهو الراجل روحت للمحكمة عشان ارفع عليه دعوي خلع وأخلص منه يمكن حياتي تتحسن وأنا بعيد عنه ".

تابع موقع تحيا مصر علي