ريهام عبد الغفور: كنت خايفة من الهجوم عليا في "أزمة منتصف العمر"

تحدثت الفنانة ريهام عبد الغفور عن كواليس مسلسل أزمة منتصف العمر، كما كشفت عن اهتمامها الشديد برأي الجمهور عبر جميع مواقع التواصل الاجتماعي.

تحيا مصر يرصد لكم تصريحات ريهام عبد الغفور

وقالت ريهام عبد الغفور خلال استضافتها في برنامج يحدث في مصر والذي يقدمه الإعلامي شريف عامر ويعرض عبر قناة أم بي سي مصر: بحب التنوع في الأدوار وبختار أدوار جديدة عليا ومعنديش مشكلة أعمل حاجة خارج عن المألوف.

وتابعت: أنا دايما بيشتغلني التنوع وبيبقى تحدي وبختار كل حاجه بعيدة عن اللي عملتها وجاتلي فرص كويسة، انا عملت أم هند عبد الحليم وأم رنا رئيس وده تحدي.

وتابعت: دور فيروز من اكتر الأدور اللي حبتها من أول ما كانت فكرة وعملنا بروفات كتير قرءاة وتحضير ولما جيت اصور كنت عايشة الموضوع وحباه جدًا.

ريهام عبد الغفور: في نماذج في الحياة أصعب وأسود من اللي كنت بتخيله

وكشفت ريهام عبد الغفور: في نماذج في الحياة تخض أكتر من اللي قدمناه في المسلسل والدنيا أصعب وأسود من اللي كنت متخيلاه وبشوف قصص وحكايات أبعد من خيالي.

ريهام عبد الغفور: كنت خايفة من هجوم الجمهور عليا

وعن تخوفها من الهجوم عليها من الجمهور بعد دورها في المسلسل قالت ريهام: كنت خايفة من هجوم الجمهور عليا في أزمة منتصف العمر لكن بحب المغامرة والفكرة خلتني اصدق اللي بعمله.

كما تحدثت ريهام عبد الغفور عن تقديم الأعمال على المنصات وقالت: السنادي كانت أول مرة أشتغل على منصة، وكانت أقل ضغط بالنسبة للاستعجال وردود الفعل حلوة واكتشفت أن الناس كلها بتتفرج على المنصات، وكنت فاكرة أن عدد قليل من الجمهور هو اللي بيتفرج على المنصات.

ريهام عبد الغفور: بهتم برأي الجمهور وبقرأ كل التعليقات

كما كشفت الفنانة ريهان عبد الغفور أنها تهتم بأراء الجمهور وردرود فعلهم وقالت: بهتم جدًا برأي الناس وبقرأ الكومنتات بتاعت الناس وأحيانا بيبقى شئ مدمر عشان الناس اللي بتهاجم.

وتابعت: بهتم برأي الدايرة القريبة مني وبكلم أبويا وأمي وأخواتي وبهتم جدًا برأيهم، وكمان جوزي وأبني الكبير بسألهم عن رأيهم، بس مش باخد رأيهم وأنا بشتغل بس بأخد رأيهم بعد العمل.

وعن رأي والدها الفنان أشرف عبد الغفور في أعمالها الأخيرة قالت ريهام: قعدت كتير حاسه أن شهادة والدي مجروحة وببقى مهتمة برأيه وبقيت اقتنع أنه فعلا عاجبه الشغل وبيتفرج بمنتهى التركيز والاهتمام وكأنه أمتحان ليا وهو مبسوط بيا الفترة اللي فاتت.