عاجل
الجمعة 29 مارس 2024 الموافق 19 رمضان 1445
رئيس التحرير
عمرو الديب

"مفجوع ومبيشبعش" .. زوجة فى دعوى خلع : جوزى بياخد الأكل من قدام أخواتى وعيالى بيجوعوا بسببه

صورة أرشيفية
صورة أرشيفية

“جوزى بيخلص كيلو اللحمة لوحده وفضحنى قدام أهلى” .. بتلك الكلمات روت زوجة لتحيا مصر من داخل محكمة الأسرة عن زوجها وحبه للطعام وإعتياده أن يأكل كميات كبيرة منه دون مراعاة لزوجته وأطفاله مما وضع الزوجة فى مواقف حرجة حتى قررت الأنفصال عنه ورفع عليه دعوى خلع بمحكمة الأسرة . 

تحيا مصر

جوزى بيحب الأكل 

بدأت الزوجة حديثها لتحيا مصر :" أنا وجوزى متجوزين من 6 سنين وعندنا ولدين توأم جوزى من أيام الخطوبة وهو بيحب الأكل وبياكل كميات كبيرة جداً منه لما كنا بنخرج مع بعض كان يطلب لنفسه أكل أكتر منى ولما كانت والدتى بتعزمه على الأكل عندنا فى البيت كان بياكل بشراهة و يفضل ياكل لمدة ساعة متواصل وأتكلمت معاه كتير وقولتله أن كدة ممكن وزنه يزيد لكن هو كان بيحرجنى ويقولى " متبقيش بخيلة وسيبينى آكل براحتى هو أنتى هتبصيلى فى الأكل ولا أية ؟" ومن ساعتها وأنا مش بتكلم معاه فى القصة ومتصورتش أبداً أن الموضوع ده هيكبر بالشكل ده بعد الجواز ويبقى سبب فى أنفصالنا". 

بياخد الأكل من قدام أخواتى 

وتابعت الزوجة حديثها :" بعد الجواز ولمدة 6 سنين جوزى كان دايماً فى أى زيارة لوالدتى وأخواتى كان لازم يحرجنى قدامهم ومبقاش عارفة أتصرف أزاى بسبب فجعه وأنه كان بياخد الأكل من قدام أخواتى بحجة أنه لسه جعان ومشبعش وهما بيبقوا لسة ملحقوش يمدوا أيديهم على الأطباق وكنت على قد ما بقدر بقلب الموضوع هزار عشان ميبقاش فى حساسية بينهم وبين جوزى وبعدها بطلبلهم ديلفرى بالشئ الفلانى لكن هما بيبقوا خلاص نفسهم أتسدت عن الأكل لحد ما بطلوا يزورونى خالص ". 

خلص كيلو لحمة لوحده وجوعنا أنا وعيالى 

 وأختتمت الزوجة حديثها :" جوزى فى الفترة الأخيرة ولما عيالى كبروا وبقى عندهم 5 سنين بقى الأكل اللى يتعمل والفلوس اللى بتتصرف على الأكل ده جوزى بس هو اللى بيتهنى بيها وبيسيبنا جعانين أنا وعيالى لدرجة أن فى مرة أشتريت كيلو لحمة وكان غالى ومجرد ما حطيته على السفرة وصحيت العيال عشان ياكلوا كان جوزى خلص كيلو اللحمة كله ومتبقاش منه غير قطعة واحدة قسمتها على ولادى الأتنين لكن ساعتها مستحملتش الوضع أكتر من كدة و أنفجرت فيه وقولته " حرام عليك أحنا مبقيناش نلحق اللقمة بسببك أنت ولا عملت أعتبار لأهلى ولا لعيالك اللى محتاجين غذا ولا حتى للعيشة الغالية اللى أحنا عايشينها وبنجيب فيها اللقمة بالعافية أنت بنى آدم طفس والعيشة معاك بقيت مرار " وسيبتله البيت وخدت عيالى نعيش عند والدتى ورفعت عليه دعوى خلع فى محكمة الأسرة عشان أخلص منه ومن فجعه ". 

تابع موقع تحيا مصر علي