والد نيرة أشرف بعد إعدام قاتلها: نامي ياحبيبتي.. والناس المتعاطفة منكم لله | فيديو

قال والد نيرة أشرف عقب تنفيذ الحكم بإعدام المتهم محمد عادل قاتل نيرة أشرف، كان نفسي أشوفه وهو داخل على غرفة الإعدام شكله غيه، بس أنا حق بنتي رجعلي بتنفيذ الإعدام، وبقول لنيرة «نامي وإرتاحي ياحبيبتي خلاص حقك رجع».

بعد إعدام محمد عادل.. والد نيرة أشرف: حقها رجع 

وتابع والد نيرة أشرف لـ تحيا مصر «أنا صحيت الصبح على تليفوني مكالمات كتير، ومردتش أرد على التليفون، وفتحت الإنترنت لقيت الأخبار نازلة - تنفيذ حكم الإعدام على محمد عادل قاتل نيرة أشرف - وروحت جري أتصلت بالمحامي بتاعها وقالي ألف مبروك حق بنتك رجع ساعتها إرتحت وكنت طاير والدنيا حواليا خلاص حق بنتي رجع».

والد نيرة أشرف لأهل القاتل: شوفوا اللي أنا شوفته

وأضاف والد نيرة أشرف «أتصلت بوالدتها بعد مكالمة المحامي وقولتلها ألف مبروك خلاص حق بنتك رجع النهاردة الصبح، وتم إعدام محمد عادل، وهي مكنتش مصدقة نفسها، وأنا فعلا مش قادر أفهم إزاي في ناس شافت فيديو نيرة ودافعت عن القاتل، إزاي شافوا اللي حصل ودافعوا عنه منكم لله».

وأكمل والد نيرة أشرف «أنا حاسس إن عدى قرن مش سنة على قتل نيرة بنتي، ولسه شايف الفيديو بتاعها من يومين بس، ودلوقتي هي والقاتل عند ربنا وهو الحق العادل، وأنا بقول لأهل محمد عادل داين تدان، شوفوا اللي أحنا شوفناه لما عرفنا إنه قتلها، دلوقتي هو مات شوفوا بقى، وفي نفس المشرحة اللي كانت فيها نيرة».

والد نيرة أشرف: كان نفسي أشوفه لحظة إعدامه

وإستكمل والد طالبة جامعة المنصور نيرة أشرف «تنفيذ حكم الإعدام على محمد عادل قاتل نيرة أشرف كان كفايا عشان حق نيرة يرجع، أنا لما كنت بحضر الجلسات كنت متكتف لأن كل الناس قالتلي لو إتكلمت القاضي هيطلعك برا الجلسة، فكنت مضطر ساعتها إني أقعد ساكت في الجلسة، ولما المتهم إتكلم النيابة ردت عليه في مرافعتها، وكان كفايا مرافعة النيابة العامة في الجلسة عليا رد على كل الناس».

وأختتم والد نيرة أشرف قائلا «مقدرش أعيش يوم من غير ما أشوف صورها، وصورتها في قلبي قبل ما تكون على الحوائط، وأنا رسالتي ليها نامي ياحبيبتي نامي وإرتاحي، الناس كلها شافت نيرة وهي مرمية على الرصيف وكان من حقي إني أشوفه وهو بيتعدم زي ما بنتي أتصورت وهي بتتقتل، وبعد ما شوفت الفيديو كان نفسي يطلع براءة عشان أخد حقها بإيدي».