محمد محمود عبد العزيز: الرئيس السيسي حاسس بينا ومحروق على بلده زينا

خرج الفنان محمد محمود عبد العزيز على توجيه رسالة للرئيس عبد الفتاح السيسي وذلك بعد مشاركته في المؤتمر الوطني للشباب بالإسكندرية، والذي كُرم به والده الراحل محمود عبد العزيز.

تحيا مصر يرصد في ذلك التقرير تعليق محمد محمود عبد العزيز على مشاركته في المؤتمر الوطني للشباب

محمد محمود عبد العزيز: ندمان إني مكنتش بحضر مؤتمرات الشباب أو بتابعها

وقال محمد محمود عبد العزيز في فيديو عبر موقع انستجرام: أنا عمري في حياتي ما حضرت أي حاجة متعلقة بمؤتمرات الشباب ولا كنت بتابعها للأسف الشديد، وأول مرة أحس إني ندمان إني مكنتش بحضر الحاجات دي، وأنا شوفت شباب زي الورد شكلهم يفرح، ومش كلهم حابين اللي بيعملوه لا ده هما مصدقين جدًا وفي فرق كبير بينهم.

محمد محمود عبد العزيز: الرئيس زينا وحاسس بينا جدا

وتابع: أنا كنت على بُعد كام متر من رئيس جمهورية بلدي وده في حد ذاته جديد عليا من غير لا فلاتر ولا مونتاج، وحسيت إن الرئيس زينا جدًا وحاسس بينا جدًا ومحروق على بلده زينا، وبيتكلم من قلبه زينا، والحاجات اللي متسببة في قلق الناس وخايفين منها هو عارفها ولم ينكر إن لدينا مشكلة، وإنه شغال عليها ودي حاجة تطمن وأسعدتني أن رئيس الجمهورية حاسس بالمشاكل وحاطيت إيده عليها.

محمد محمود عبد العزيز يتحدث عن إنجازات السيسي

وتحدث محمد محمود عبد العزيز عن  إنجازات الرئيس السيسي، قائلا: شوفت إنجازات في الإسكندرية عديت عليها عادي وكباري جديدة وقلت الله، ولكن بالنسبة ليا شايفها عادي، لكن أول مرة أبقى قاعد وأعرف اتعملت إزاي وأخدت وقت ومجهود قد إيه واتكلفت كام، وحسيت إن الموضوع كبير وشبه الإنتاج عندنا في الدراما، لأن عندنا ممكن دقيقتين نقعد فيها أيام تصوير وده بالنسبة لنا مجهود وده لا يقارن بمجهود الدولة ولا مجهود الناس اللي بتحفر في الصخر عشان يعملوا لنا طرق ولا كباري، وحسيت للأسف في البداية إن الحاجات دي عدت عليا عادي ولم تلفت نظري وده حال ناس كتير للأسف.

وأضاف: لكن الموضوع مش سهل خالص خصوصًا فكرة حياة كريمة، وفكرة البيوت الجديدة اللي اتعملت والناس اتنقلت من عشوائيات إلى بيوت أفضل، الناس دي كانت في كوارث وعدت منها وإحنا محسناش بيها رغم إننا في بلد واحدة، وهمومنا واحدة، وللأسف مش بنركز في المجهود اللي ورا ده.

محمد محمود عبد العزيز: بحب بلدي وبخاف عليها

واختتم محمد محمود عبد العزيز حديثه، قائلًا: مش عيب أكون وطني وأحب بلدي، وعاوز أقول شكرًا لمصر وشكرًا للرئيس عبد الفتاح السيسي واتشرفت بوجودي مع حضرتك، والثواني البسيطة اللي اتكلمت فيها مع حضرتك أسعدتني وكنت أتمنى إنها تطول لأن كان جوايا كلام كتير نفسي أقوله لحضرتك، وأنا بحب البلد وبخاف عليها جدًا، والكلام اللي سيادتك قلته في المؤتمر لمسني جدًا وصدقته جدًا، وأتمنى من كل قلبي إن لقائي بحضرتك يتكرر، وربنا يعين حضرتك ويقدرنا جميعًا إننا نساعد بلدنا بأي شكل يفيد البلد بأي طريقة.