خاص| محمد سليمان: تريند "ده هاني" عملي انتشار وأتمنى أتعرف بأعمالي المفيدة

كشف الفنان محمد سليمان تفاصيل وأراء كثير في حياته الشخصية والعملية، فضلا عن دوره في مسلسل الناقور الذي بدأ تصويره منذ أيام ترقبا لعرضه قريبا على شاشات التليفزيون.

تحيا مصر يرصد في ذلك التقرير تصريحات الفنان محمد سليمان على هامش مسلسل الناقور

محمد سليمان: محمد رياض وأحمد فؤاد سليم أساتذتي وبحب الشغل معاهم

تحدث محمد سليمان عن دوره في مسلسل الناقور، فقال: دور مش جديد عليا، ظابط خرج من الخدمة وبيشتغل مع محمد رياض، وبتدور الأحداث في الإطار ده، والحقيقة غن كواليس المسلسل رائعة وبدأت أولى مشاهدي مع محمد رياض وبعده الفنان أحمد فؤاد سليم وهما أساتذتي وبعشق شغلهم.

محمد سليمان عن تريند “ده هاني”: عملي انتشار كبير

وتطرق محمد سليمان بحديثه عن تريند “ده هاني”، والذي قال عنه: تريند ده هاني كان حاجة مقتبسة من مسلسل هذا المساء وده من أعظم المسلسلات اللي اشتغلت فيها، مع اياد نصار وأروى جودة، وكان تريند كوميدي شوية وكسر الدنيا، والشوت اللي هما عملوه كان خارج وغير مألوف عن الدراما اللي بنشوفها

وتابعد حديثه: التريند معملتهوش ولا ليا دخل فيه، وفادني لأنه عمل انتشار ليا لأن مصر بقت عايشة على التريندات بس مش معقول تكرس حياتها للتريند، عيش حياتك بس متعشش للتريند، ففي ناس بتاخد التريند إنه شيء لطيف وإن أنا نفسي أبقى تريند وأنا واحد من الناس اللي مش بهتم بحاجة زي دي.

محمد سليمان: اللي يعيش حياته للتريند إنسان فاضي

واستكمل: تريند “ده هاني” عملي انتشار لأنه خلى ناس مكنتش عرفاني تعرفني وأكيد خلى ناس هتبتدي تدور عليا وعلى أعمالي وده ممكن يكون مفيد للفنان لكن أما تعيش حياتك للتريند فأنت انسان فاضي معندكش حاجة تعملها، عيش حياتك بس متعشش عشان تبقى تريند، في شباب كتير تتمنى تطلع تريند عشان الناس تعرفهم لكن أنا فنان مش محتاج حاجة زي دي، وأتمنى إن أطلع في محتوى مفيد.

وكشف محمد سليمان عن معاييره في اختيار أدواره، فقال: معاييري في اختيار أدواري اني عايز أشتغل كل الفنانين عايزين يشتغلوا ميقعدوش في البيت والفنان الحقيقي اللي عايز يوصل نفسه للناس هو اللي عايز يشتغل، وإن أعمالي تبقى هادفة وليها فكرو ولو أكشن تبقى ضخمة وكبيرة.

محمد سليمان وأعماله الفنية الأخيرة

وعن مشاركته في مسلسل الضاحك الباكي، قال محمد سليمان: عملت شخصية صعبة جدا والعمل كان صعب وعشان أعمل ميكب ممكن 3 ساعات قبل ما ابتدى التصوير، والتجربة كبيرة مهمة جدا. 

أما عن وبينا ميعاد، فقال: كان معانا مجموعة عظيمة من الشباب ومن أكثر الشباب الموهوبين ولكاست كان رائع، والمخرج أما يكون مؤلف العمل بيروح لحتة تانية عشان كدة المسلسل كسر الدنيا ولمس الناس والموضوع كان شيق جدا.