محمد أنور: الناس بتلوم عليا عشان مش متواجد في السينما.. وكان ممكن أعمل 10 أفلام بطولتي

تحدث الفنان محمد أنور عن مشاركته في موسم عيد الأضحى خلال فيلم مستر إكس والبعبع، وذلك خلال لقاء له ببرنامج الراديو بيضحك مع الإعلامية فاطمة مصطفى.

تحيا مصر يرصد تفاصيل تصريحات محمد أنور

محمد أنور في السينما

وقال محمد أنور: كنت متوقع ردود الأفعال على مشاركتي في أفلام موسم عيد الأضحى، وكنت مستنيها كمان، أنا بقالي كتير أوي معملتش سينما، وكانت ناس كتير بتلوم عليا في فكرة أنت مش متواجد، وممكن ناس تسبقك، أنا كنت أقدر أعمل طول المدة اللي فاتت دي 10 أفلام بطولتي، بس أنا نفسي أعمل السينما زي النجوم اللي احنا اتعلمنا منهم اللي ملخبطوش، وعملوا من بدايتهم أفلام حلوة.

وتابع: نجم السينما مختلف تمامًا عن نجم التلفزيون، بدليل أن ممكن يكون فيه نجم في التلفزيون كبير جدًا وبينجح بس في السينما ميجبش نفس الإيرادات، ومن ساعة مسرح مصر الناس بتتعامل معانا على أننا ولاد عمتهم، أنا روحت أعمل عمرة في رمضان ومعايا أمي وأبويا ومراتي وبنتي، الناس كانوا بيسألوني عن والدتي.

محمد أنور وسامح حسين 

وسبق وأن حل الفنان محمد أنور ضيف برنامج حبر سري مع الإعلامية ياسمين عز، وذلك عبر شاشة قناة القاهرة والناس، وتحدث عن مدى موافقته بدخول بناته الفن وبعض المواضيع الأخرى. 

وتحدث أنور في البداية عن الفنان سامح حسين بالنسبة له، قائلًا: سامح حسين أستاذي وكان بيخرجلي في الجامعة وشوفنا نجاحه في عنينا، وكان بيخش الجامعة والناس كانت بتشيل العربية بتاعته، معملناش حاجة سوا ولو اتقدملنا احنا عنينا ده اخونا. 

أما عن دخول بناته الفن، قال: متكلمتش في ده خالص قبل كده، ووجهة نظري ان مينفعش تفرض على أي حد أي حاجة، والمهن اللي هما يختاروها عشان انا لما اتفرض عليا دراسة درستها عشان اهلي وبعدين مشيت في اللي انا بعمله. 

تفاصيل فيلم مستر إكس

ومن الجدير بالذكر أن فيلم مستر إكس تدور أحداثه حول إكس الذي تتسبب عقدة نفسية قديمة لديه في إنشاء منظمة سرية، يسعى من خلالها بدفع الرجال لطلاق زوجاتهم، ولكن تنشأ قصة حب بينه وبين محامية تضعها الظروف في طريقه، فيحاول جاهدا إبعادها عن كل المخاطر.

ويشارك في بطولة الفيلم عدد كبير من النجوم والنجمات، منهم: أحمد فهمي، هنا الزاهد، محمد أسامة الشهير بـ أوس أوس، بيومي فؤاد، صبري فواز، محمد أنور، عمرو يوسف، مصطفى خاطر، ومن من تأليف أحمد عبد الوهاب وأمجد الشرقاوي، وتحت قيادة المخرج أحمد عبد الوهاب.