بعدما اتهامه بمهاجمة نجاح الأخرين.. محمد رحيم لـ رامي صبري: سرقت ألحان بتاعتي من سنين وأنا ساكتلك

هاجم الملحن والموزع محمد رحيم الفنان رامي صبري وذلك بعد أن اتهمه رامي صبري أنه يقوم بمحاربة نجاح الأخرين.

تحيا مصر يرصد لكم رد محمد رحيم على رامي صبري

وكتب محمد رحيم عبر حسابه بموقع التواصل الاجتماعي فيسبوك: ردي على  صديقي الفنان الكبير رامي صبري بعد اتهامه ليا في وسائل الاعلام اني بهاجم  النجاح مع كل الحب والتقدير أولا يعلم الله سبحانه وتعالى اني معنديش أدنى وقت أضيعه في اني ادخل في أي مواضيع نظرا لانشغالي بمجموعه أعمال مهمه جدا ان شاء الله الناس هتشوفها قريب.

وتابع:  ولكن تعليقا على مشكلتك انت وعمرو مصطفى اللى الحمد لله اتحلت في مداخله اذاعيه وربنا مايجيبش زعل أبدا بين الأخوات ولكن للأسف اللى حصل أن اسمي تم أقحامه من طرفك بشكل لايليق  ونظرا لأن المداخله كانت على إذاعة مشهوره .

وأضاف: فطبعا اتسمعت من بعض أفراد عائلتي ومنهم بنتي وأكيد  قطاع كبير من جمهوري اللى بيحبني وبيحترمني وبيحب اعمالى فوجب إني أرد عليك بكل حب واحترام علشان أوضح واصحح المغالطات اللى حصلت في المداخلة.

وتابع: انت قلت في المداخله بالنص انك سنه 2013 هاجمتني بنفسك علشان أنا كنت (بحارب نجاح ) كان أخويا الفنان عمرو مصطفى حققه وقت ماقدم أغنيه بشره خير وكأن أنا راجل معنديش حاجه اعملها غير إني اهاجم واحارب الناس الناجحين وانت اللى وقفت في وشي.

محمد رحيم: أنا مش ناقص تاريخ عشان اهاجم أي حد ناجح

وكشف: ده طبعا كلام مغلوط ومسئ ولازم اصححه وأبين للناس الحقيقه اللى سكتت عنها سنين احتراما للعشره الطويلة والصداقة اللى بتجمعنا كلنا أولا انا الحمد لله مش ناقص نجاح وتاريخ بفضل الله سبحانه وتعالى علشان اهاجم اي حد ناجح ربنا يعلم اني بدعي في صلاتي بالرزق والتوفيق لكل الناس وبتمنى الخير للجميع.

واسطرد:  اللى حصل ساعتها اني علقت أن لحن بشرة خير شبيه إلى حد التطابق لـ عملين من أعمالى وهما  أغنية لاكده عاجبين للمطربه الصاعده ايمان سمير واغنيه كل ده يطلع منك للنجمه شيرين وجدي والأغنيتين صدروا سنة 2004 
يعني قبل صدور لحن بشره خير بـ 9 سنين.

واستكمل: على الأقل ونظرًا لنجاح بشره خير وفرحتنا كلنا بيها أنا قفلت الموضوع تمامًا ومرضيتش أبين للناس انا بقول كده ليه!!! ولكن الفيديو اللى تحت ده هو الفيصل اللى هيبين للناس اذا كنت بخترع كلام من دماغي ولا كلامي فعلا صح بناء على علم ودراسه وخبره وانت طبعا راجل فاهم ودارس مزيكا برضه زينا.

محمد رحيم لـ رامي صبري: خدت لحن أغنية بحب عيونك لعمرو دياب ومشاعر لشيرين وعملت بيهم أغاني ليك

وتابع: كما تم إرفاق لحنين آخرين من أعمالى وهما أنا بحب عيونك للفنان عمرو دياب ومشاعر للفنانة شيرين عبد الوهاب واللى حصل اني لقيت نفس اللحنين دول تم استعمالهم في أغاني خاصه بيك وحققوا نجاح كبير معاك من غير ما تضع اسمي عليهم على الاقل جنب اسمك وطبعا الفيديو هيوضح المسأله دي جدا حتى لغير المتخصصين.

محمد رحيم:  المحبة والصداقة منعوني أرفع قضية عليك

وقال رحيم: واثق أن الجمهور هيتفاجئ وفي ناس كتير هتستغرب انا ازاي سكتت طول السنين دي والإجابه لأني إنسان مسالم ومحترم وعمري ما اسمح لنفسي ارفع قضيه على زميل وأخ ومؤمن بتوارد الخواطر وحسن النيه دائما وطبعا دي مش مني دعوه للتخلى عن الحقوق ولكن العشره الطيبه والمحبه والصداقه ليها علينا حق.

وتابع: والخلاصة  انك هاجمتني قبل كده أكتر من مره ومازلت لأني قلت كلمتين (فضفضة) هما من صميم حقي وقوانين الملكيه الفكرية واضحه ومفيهاش هزار في بلدنا وفي كل دول العالم وكنت بشوف مجهودي وتعبي بينسب لغيري وبستحمل وبسكت عشرات المرات وللأسف انت اللى زعلان وبتتهمني اني كنت بهاجم النجاح لأ أنا قطعا مش بهاجم النجاح لأنني والحمد لله صديق النجاح انا فقط كنت بعلق على استحياء وخجل على ظاهره سلبيه جدا ومتكرره في أسلوب العمل في الوسط الفني.

محمد رحيم: دي ظاهرة استغلال واستحلال مجهود ناس بدون حق

وأضاف: هي ظاهرة استغلال واستحلال مجهود الناس بدون وجه حق ونسبته لغير أصحابه الحقيقيين وأنا عايز بعد تجربتك الأخيره مع عمرو اللى سببت المشكله دي كلها الناس تحاول تتخيل انا ساكت على ايه بقالي سنين ولكن بعد الاعتداء على اعمالى وافكاري ومجهودي ثم سكوتي وصمتي اطلع بحارب النجاح كمان وكمان اطلع مش عاجب ؟؟؟.

وأشار: لأ طبعا ده كلام مرفوض تمامًا وفعلا أنا مش هسمح لأي حد يقوله وربنا يسامح الجميع وطبعا أنا برد على الملأ لأنه كلامك كان على الملأ فلذا وجب التصحيح والتوضيح مع تأكيدي أن عمرو مصطفى طبعا انا بعشقه وبحبه من قلبي وانت كمان اخويا وبحبك والدليل اني اول مره اتكلم على مواضيع زي دي حدثت منذ سنوات.

واختتم منشوره قائلًا: لكن زي مانت عندك أسرة وعندك جمهور تخاف على شكلك قدامهم أنا كمان زيك بالظبط مع تمنياتي بالتوفيق والنجاح الكبير للجميع اخوك الموسيقار المصري العالمي المجتهد والمحترم والمحب محمد رحيم.