هل حدث خلاف بين نيللي كريم وفريق عمل فيلم ع الزيرو؟.. ماندو العدل يجيب

نفى المخرج ماندو العدل كل ما تردد حول وقوع خلاف بين النجمة نيللي كريم وفريق عمل فيلم ع الزيرو بسبب مكان وحجم صورتها على بوستر العمل.

تحيا مصر يرصد تفاصيل تصريحات ماندو العدل في برنامج الراديو بيضحك

حقيقة خلاف نيللي كريم مع فريق عمل فيلم ع الزيرو

وقال ماندو العدل خلال لقائه اليوم ببرنامج الراديو بيضحك مع الإعلامية فاطمة مصطفى: أنا معنديش أي معلومة عن حاجة من الحاجات دي، أنا كل اللي أعرفه أن نيللي كريم صورت الفيلم وهو عاجبها وحباه، وكانت مبسوطة جدا بالدور وخلصت أخر يوم تصوير وهي بتشكرنا على الفيلم، والمعلومة اللي عندي بحكم قرب علاقتي بنيللي أنها مسافرة.

وتابع: وأنها مخدتش إجازة بقالها فترة طويلة جدا، كانت بتعمل مسلسل شهر رمضان، وكان عندها مسلسلات قصيرة، فلحمت أعمال كتير في بعض، وأنا مسمعتش خالص أنها زعلانة أو أنها متفقة أن شكلها في الأفيش يبقى بشكل معين ومحصلش، ولو كان فيه اتفاق على أي حاجة كان أكيد هيتعمل.

ماندو العدل: هشام عاشور مشتغلش في عملة نادرة بالواسطة

وبسؤاله عن مشاركة الفنان هشام عاشور في مسلسل عملة نادرة قال ماندو العدل: عشان هو جوز نيللي فالناس أكيد متضايقة أنه معاها في المسلسل، وكلام بقى واسطة ومش عارف ايه، أنا هشام اشتغل معايا في فيلم الملحد، وحظه أنه الفيلم متعرضش قبل المسلسل.

وتابع: وعمل مشهد وكان كويس جدا، وأنا اللي رشحته للمسلسل، وأنا مش فارق معايا الطريقة دي في التفكير، أنا فارق معايا النتيجة، لو كويس يبقى احنا اتوفقنا لو لقدر الله طلع مش كويس يبقى احنا متوفقناش، وهو مش شغال عشان هو جوز نيللي.

أخر أعمال ماندو العدل

ومن الجدير بالذكر أن أخر أعمال ماندو العدل فيلم ع الزيرو الذي يناقش قصة إنسانية لمعاناة أب فقير مع مرض ابنه ومحاولة إنقاذ حياته، ولكن تتطور الأحداث ويصبح من الأغنياء.

الفيلم بطولة النجم محمد رمضان والنجمة نيللي كريم، چومانا مراد، خالد الصاوي، محمد لطفي، شريف دسوقي، إسلام ابراهيم، تأليف د. مدحت العدل وإخراج محمد العدل ومن إنتاج جمال العدل وأحمد العدل واستوديوهات ڤوكس.