منى زكي خطيرة وتمنيت أعمل دورها في لعبة نيوتن.. أبرز تصريحات عبير صبري

حلت الفنانة عبير صبري ضيفة على برنامج مساء الإمارات المذاع عبر شاشة الظفرة والذي يقدمه الإعلامي عبدالعزيز أحمد، وخلال الحلقة كشفت عن تفاصيل في حياتها الشخصي وعن الهجوم على الفنانة ريهام حجاج.

تحيا مصر يرصد لكم أبرز تصريحات عبير صبري لـ مساء الإمارات

عبير صبري: أستاذ أحمد آدم اشتغلت معه وأنا لسه ببدأ وبحط رجلي في أول خطواتي الفنية

اختار أكون غنية جدًا وعمري ما فكرت أني أكون مشهورة ولا كان تارجت

كل حاجة عملتها في مشواري كنت عايزها ومكنتش صدفة لكن حبًا فيها

عايزة أمثل مع كريم فهمي فيلم سينمائي

اشتغلت مع (بيوكا) بيومي فؤاد وأحب أني أشتغل معه بجد خطير وإنسان عظيم

عايزة أجرب أشتغل مع شيكو لأن بيعجبني أفلامه أوي وعجبني دماغه جدًا

بتفرج على اللعبة وبحب شيكو جدًا ككوميديان.. مشتغلتش معه وأحب طبعًا أتعاون معه

أنا ست بيت واشتغلت مذيع وممثلة ولو سبيت التمثيل بعرف أطبخ والأكل حاجة له قيمة ومعنى

بعد كل دور بعمله في آخره بحس أني في وضع صعب

في مسلسل جميلة حسيت أني في مهنة صعبة وقاسية أوي وده بيحصل طول الوقت لكل الممثلين مش أنا لوحدي

في أدوار عربية وعالمية تمنيت تكون ليا زي دور منى زكي في لعبة نيوتن

منى زكي خطيرة وعظيمة بتفرج عليها بفرح وبستمتع

الفنان لما بيتفرج على زميله بيكون عنده حتة فهم للقطعة الجميلة اللي بتعزف دي وبستمتع

أنا مقصرة في حق التمثيل بسبب حاجات تانية ومبقصرش في حق حد ولكن مقصرة في حق نفسي

في كتير بالوسط الفني بتغير مني واتخدعت في ناس كتير فترة طويلة في الشغل والصحاب

ريهام بتتعرض لهجوم بعيد كل البعد عن أدائها التمثيلي وأنها مظلومة 100%

ريهام ممثلة شاطرة جدًا وموهوبة ومجتهدة ولها أعمال ناجحة وتاريخ رغم صغر سنًا ولسه قدامها مستقبل

ريهام عملت شغل حلو جدًا سابقًا وحاليًا وبتطور من نفسها كل فترة وبتعرف تختار ورق حلو جدًا

قولنا كتير كلنا أن اللي بتتعرض له ريهام حجاج مش عشان شغلها أبدًا

ريهام حجاج ممثلة محترفة وبتشتغل على نفسها جدًا وفاهمة كل حاجة وهي بتشتغل وعلقها منظم ومذاكرة الورق

ضحكتي أقرب عشان أخبي دمعتي

بحب الكوميدي والتراجيدي والتمثيل كله

بحب الأكل الصحي وبفضل الزواج عن حب في الزواج

دائمًا التفاهم والاحترام والحب مهمين جدًا هي الفلوس مهمة بس مش سبب اختيارك لشخص

أحب أسكن في مكان فيه بحر وزرع ممكن أسكن على البحر وأعمل جنينة حواليا وأزرع براحتي

بما أننا في دولة عربية أحب أسافر دولة أجنبية شوية برد وتغييرات  

آخر أعمال عبير صبري

ومن جانبها، شاركت عبير صبري في الماراثون الرمضاني 2023 من خلال مسلسل جميلة والتي تعاونت فيه مع كل من سوسن بدر، يسرا اللوزي، أحمد وفيق، هاني عادل، هشام إسماعيل، نبيل عيسى، ياسر علي ماهر، عبير منير، رحمة حسن، ريم سامي، رحاب حسين، مدير التصوير وائل درويش، مهندس الصوت أحمد سمير، موسيقى تصويرية هاني عادل وهو من تأليف أيمن سلامة وإخراج سامح عبدالعزيز وإنتاج جمال العدل.

قصة مسلسل جميلة

وتدور أحداث مسلسل جميلة في إطار تشويقي واجتماعي ويلقي الضوء على مشاكل الميراث ومواجهة الأزمات الزوجية، حول جميلة متزوجة ويتعرض زواجها للعديد من الأزمات، بالإضافة إلى مشاكل بينها وبين عائلتها بسبب وصية والدها الذي كتب كل الميراث باسمها دون باقي العائلة بعد وفاته ومع تطور الأحداث تكشف العديد من الأزمات.