لقاء سويدان: دوري في الوصفة السحرية حلو ومختلف.. كنت حابة أعالج قضية الطلاق

حلت الفنانة لقاء سويدان ضيفة على برنامج عيش صباحك وكشفت كواليس مشاركتها في مسلسل الوصفة السحرية بطولة شيري عادل وعمر الشناوي، وتحدثت عن أهمية القضية التي يعالجها وهي طلاق المرأة أكثر من مرة وكيف ينظر لها المجتمع.

لقاء سويدان عن الوصفة السحرية: ربنا بعت لي الدور ده

كشفت لقاء سويدان خلال برنامج عيش صباحك عن كواليس دورها في مسلسل الوصفة السحرية، رصده لكم موقع تحيا مصر، وقال: "ربنا هو اللي بعت لي الدور ده، أنا كان بقالي كتير ما اشتغلتش اجتماعي كوميدي، والدور حلو أوي، والمنتج الفني للعمل هو اللي كلمني إنه فيه دور مختلف وعايزني فيه".

وتابعت لقاء سويدان قائلة: "هنصور بعد أسبوع وكان مكتوب 10 حلقات والشخصية كان الشكل بتاعها واضح والقضية أحب أتكلم فيها، اللي هي الست اللي اتطلقت أكتر من مرة وإزاي الناس بتتعامل معاها وهي عقلها حر وست مثقفة وكنت حابة أعالج القضية دي".

لقاء سويدان: في موروثات بتقيدنا وتحطنا في قوالب

واستنكرت لقاء سويدان الموروثات الثقافة في المجتمع ضد المرأة المطلقة، وقالت: "طول الوقت شايفة الناس حاطه تابوهات كده لا ليها علاقة بدين ولا أخلاق هي موروثات بتقيدنا وتحطنا في قوالب، وتناقشت مع المخرج على شكلها وإزاي يدل على حرية الشخصية".

كان هيموت في التصوير وتصدر التريند في إسرائيل.. دياب يكشف تفاصيل لأول مرة عن مسلسل مليحة

دياب يكشف لفاطمة مصطفى إمكانية دخول زوجته مجال التمثيل

لقاء سويدان تكشف علاقتها بطليقها

ومن جانبه، كشفت الفنانة لقاء سويدان علاقتها بطليقها وأكدت على ضرورة عدم تأثر الأطفال بانفصال الوالدين، وقالت: "أنا عندي بنوتة عندها 19 سنة وعلاقتي كويسة جدًا بأبوها، لدرجة إنها بتقول لي لما أنتم بتحبوا بعض كده سبتوا بعض ليه".

وأضافت لقاء سويدان أن الحب والاحترام لا علاقة له باستكمال الزواج، وقالت: "قولت لها مش شرط إني بحبه واحترمه وعمري ما قولت عليه كلمة مش كويسة قدامها، هي مالهاش علاقة بعلاقتي أنا بيه وده الصح إذا إحنا بنحب ولادنا لازم نخلي علاقتهم كويسة بوالدهم".

لقاء سويدان: علاقتي كويسة جدًا بزمايلي

وعن كواليس مسلسل الوصفة السحرية أكدت أنها كانت جيدة كما أنها علاقتها بزملائها في العمل ممتازة، وقالت: "مش بيفرق معايا إن يكون فيه حاجة بيني وبين الناس لأني علاقتي كويسة أوي بزمايلي وكانت أول مشاهد جمعتني مع إسلام جمال وبسمة داوود وبانت الأجواء من أول تعامل، وأنا ما يهمنيش الشخص لكن يهمني الممثل، وبعد أول أسبوع تصوير بقينا مش عاوزين نروح، بنستنى بعض نتغدى سوا ونقعد نتكلم كبنات مع بعض ونتفرج على مشاهد بعض".

لقاء سويدان: مش بعتمد على السوشيال ميديا في ردود فعل الجمهور

والجدير بالذكر، أن لقاء سويدان أوضحت أنها كانت بعيدة تمامًا عن السوشيال ميديا ولكن حاليًا بدأت تهتم بها، كما أنها لا تعتمد على ردود أفعال الجمهور على السوشيال ميديا.

وقالت: "مش بعتمد على السوشيال ميديا في ردود الفعل لكن باخده من الشارع، والنجاح الحقيقي إنك لما تلاقي الناس مصدقة الشخصيات بجد، وبدأت أتعلم شوية السوشيال ميديا في إنستجرام وتيك توك عشان أقرب من الجيل الجديد".