مقتلتهاش .. ننشر اعترافات بائعة الخضار التى انهت حياة مسنة لسرقة مصوغتها بالغربية

حصل " موقع تحيا مصر " على اعترافات ' بائعة الخضار ' المتهمة بانهاء حياة سيدة مسنة، لسرقتها مصوغتها الذهبية داخل المحل الخاص بها، وتخلصت منها عن طريق وضع جثتها فى جوال والقائه فى مصرف بقرية فرسيس التابعة لدائرة مركز زفتى، بمحافظة الغربية .
حيث قالت فى اعترافتها امام النيابة العامة " اللى حصل انا عارفة الست نادية من زمان وهى دايما بتجى تشترى من عندى خضار وفراخ واوقات بتتصل عليا بجهزلها الحاجة وببعتهالها، ويوم الاتنين بتاريخ ١٦ فبراير، كنت موجودة فى المحل بتاعى لقيتها داخله عشان تشترى شوية حاجات ومكنش حد موجود، فجأة سمعت خبطة ببص ورا الستارة لقيت الحاجة وقعه على وشها وبتجيب دم من بوقها او مناخيرها ولما لقيتها واقعة على وشها قلبتها ونيمتها على ضهرها، لقيت دم على وشها فضلت ادعك فى صدرها وجبت شفشق مايه ورميته على وشها فلقيتها مفاقتش بردوا، فانا ساعتها لقيت غوايش فى ايديها اليمين، فرحت قلعتها الغوايش من ايديها، وكانوا خمسة وجبت كيس، اسود وروحت لفيت الغوايش فيه وحطيتهم فى البلاعه بتاع المحل.

واستكملت المتهمة اعترافاتها : بعد كدا كان عندى شيكارة فى المحل وجبت شيكارة تانية من واحدة جارتى، وقولتلها عاوزاها عشان احط فيها شوية تبن ورجعت المحل تانى لقيت دفاية بتاعت بنتى لونها احمر فى اصفر وحطيت الحاجة نادية فى الشيكارة وحطيت شيكارة تامية ولفيتها الاتنين وحطيت طرحتها عند رجليها، وبعدها سبتها ورا الستارة وقمت متصلة على ابن عم جوزى المدعو ' محمد صلاح ' وقولتله عاوزة العربية الكارو بتاعتك عندى نقلة عاوزة اوديها المزرعة، وهرمى شوية زبالة على المصرف، فقالى مش هتعرفى تسوقى العربية، بالفرسة، انا هبعتلك ابنى يوديكى، بعدها جه بالعربية، وخليته يقف قدام المحل حطيت كام عداية، على العربية، ودخلت جبت الشيكارة، وشديتها لبره لحد مت وقفتها عند العربية، وكان واقف ابن صاحب المحل، وواحدة تانية، رفعوا معايا الشيكارة على العربية، وطلعنا على المصرف، نرمى الزبالة ورميتها فى قلب الغاب بالمصرف ورجعت .

بينما اكد صاحب السوبر ماركت المجاور للمتهمة واحد شهود العيان، ان " المتهمة لمياء احمد مأمون سألتنى قبلها باسبوع عن الكاميرات الخاصة بالمحل بتاعى بتجيب المحل عندها ولا لاء، قولتلها ليه ؟ قالتلى اصل صباطت موز اتسرقت من قدام المحل ومش عارفة مين اخدها، فانا رجعت المحل وحتى مرجعتليش سألتنى على الكاميران ولا قالتلى ام هى عايزة تشوف حاجة ولا جاتلى المحل وقالتلى انى اراجع الكاميرات ولا اى حاجة ومن بعدها وقبل الواقعة، بيوم، لقيت واحدة بتقولى ان لمياء كلمتها وقالتلها اسألى عمك هيا الكاميرات، بتاعه جايبة المحل بتاعى ولا لاء وانا قولتلها ايوا يا بنتى جايبه المحل من بره بس مش جايبة المحل من جوه، بعدها عرفت باللى حصل .

كما اوضحت احدى السيدات وشاهدة عيان على الواقعة، " انا البيت بتاعى فى نفس الشارع، ودايما بقعد ادام البيت والمتهمة بتكون فاتحة المحل، وفى يوم لقيتها بتنده عليا وبتسألنى هى الكاميرا بتاعت عمك " يحيى " بتجيب المحل بتاعى، قولتلها والله يا لمياء مش عارفة هشوفهالك ولما سألته قالتلى عشان صباطت موز وقفاصة بتاع الفراخ لقيت القفل مفتوح، قولتلها خلاص هبقى اسالك عمى وقالى انه بص على الكاميرات ولقيتها جايبة المحل بتاعها من بره ومن جوه لاء .

واردفت، " وفى يوم الواقعة، شوفت المجنى عليها وهى داخله المحل وبعدها سمعت صوت صويت بس كان مكتوم فجريت انا وكام واحدة من الشارع، لقيت الصويت جاى من المحل بتاع "لمياء"، ولسه جاية ادخل لقيتها من ورا الستاره بتقول محدش يدخل عليا غوروا اطلعوا بره، فانا محطتش فى دماغى حاجة وفكرتها تعبانه، ومردتش ادخل عليها، وبعدها بخمس دقايق لقيت المتهمة خارجة من المحل وركبت عربية كارو وحطت عليها شيكارة كبيرة ومشيت بيها ، وبعدها رجعت ركبت كانوله فى الصيدلية، وشاورتلى، وقالت انها تعبانه ومخنوقة، وعايزة تصوت .

وتعود الواقعة عندما تلقت الاجهزة الامنية بمديرية امن الغربية، اخطارا من مامور قسم مركز زفتى، بورود بلاغات من الاهالى تفيد بعثور على جثة سيدة تدعى ' نادية ' فى العقد السادس من عمرها ملقاة فى احدى الترع، ويوجد شبهه جنائية .

على الفور انتقلت قوة امنية الى محل البلاغ، وتم انتشال الجثمان وتبين من المعاينة المبدئية، ان السبب وراء الجريمة سرقة مصوغاتها الذهبية،وتشير المعلومات الأولية إلى أن المتهمة وهى صاحبة محل دواجن وتدعى "لمياء" قامت باستدراج المجني عليها المعروفة بـ"أم أحمد" داخل محل الدواجن قبل أن تعتدي عليها وتنهي حياتها ثم أقدمت على تقطيع الجثمان إلى نصفين وإخفائه داخل شيكارة وفي محاولة لإخفاء معالم الجريمة، وتم التخلص منها بالقاء جثتها فى مياه احدى الترع، بقرية فرسيس.

وتم نقل الجثة لمشرحة المستشفى العام لتوقيع الكشف الطب الشرعى عليها، واعداد تقرير مفصل بها، لتحديد اسباب الوفاة، وبتقنين الاجراءات امكن ضبط المتهمه واعترف باقترافها الجريمة، كما تكلف ادارة البحث الجنائى بالتحرى عن ظروف وملابسات الواقعة عن طريق رصد كاميرات المراقبة بالمنطقة، وتحرر المحضر اللازم، لاخطار النيابة العامة ..