عاجل
السبت 20 أغسطس 2022 الموافق 22 محرم 1444
رئيس التحرير
عمرو الديب

زوج في محكمة الأسرة: مراتي خلعتني واستولت على شقتي وشقى عمرى| فيديو

الحج محمد
الحج محمد

« مراتي خلعتني بعد 18 سنة جواز وكنا عايشين مع بعض في مستوي كويس لينا، وباعتني بعد كده».. بتلك الكلمات بدا الحاج محمد حديثه لـ تحيا مصر ليروي لنا معاناته مع زوجته وكيف تمكنت منه المشاكل.

تفاصيل القصة

فيقول الحاج محمد:" عيشت مع مراتي 18سنة ومعايا منها تلات أولاد ومن جوزها الأولاني ولدين وأنا اللي مربيهم وكنت شغال في شركات الدعاية والاعلان وكان معايا عربيتين ملاكي وبسيبلها الفلوس تصرف منها براحتها". 

شراء شقة

وأضاف :" أنا اشتريت شقه 180 متر من 4 سنين على أقساط ودفعت في الأول 300 ألف جنيه وبعت شقة كانت عندي وقطعة أرض كانت معايا لحد ما سددت 605 ألف جنيه ومراتي دفعت فقط 95 ألف جنيه من ثمن الشقة، وعلشان كنت بحبها وبراضيها كتبت الشقة باسمها".

الظروف بقت وحشة 

ويستكمل الزوج:" الظروف بقت وحشه معايا وبقيت بشتغل علي تاكسي أجرة فقولتلها نبيع الشقة وهي مش راضية خالص وقالت أنا تعبت وأنا بقالي 17 سنة عايشة معاك وبدأ كلامها يتغير من قلة الفلوس والعيشة معايا ومبقتش مستحمله كده، وأنا كنت عاوز ابيع الشقة عشان افتح مطعم أو أي مشروع ويدخل لينا دخل كويس نعيش منه".

عايزه تطلق

ويضيف الزوج: "مراتي اتصلت بأحد الأقارب وهو عم فرج وقالتله خلينا نتطلق، فلكمتها وقولتلها عشان قولتلك نبيع الشقة تطلبي الطلاق قالتلي لا فقولتلها أنا مش هطلق قالتلي خلاص أنا هروح أعمل قضية خلع ضدك في محكمة الأسرة فقولتلها روحي المحكمة واخلعي وأنا هطالب بحقي في الشقة اللي أنتي أخدتيها مني وأنا اللي كتبتهالك هدية باسمك".

بتقولي بشرب ترامادول

وأوضح:"ولادها كلموها حتي أخواتها البنات قالولها ارجعي بس هيا متسلطة ورأيها من نفسها حتي إنهم راحوا كلموها فقالتلهم لا برضو وبتقول عليا أنا راجل باخد ترامادول وأنا مستعد احلل ولو كنت باخد باخد مسكن عشان وجع ضهري، وأنا راجل مريض عندي فقرات في ضهري تعباني وأنا باخد عشان أقدر اشتغل بعد ما شغلي وقف إنما دلوقتي مفيش معايا فلوس اشتري العلاج وأنا يا دوب حتى وقتنا الحالي ببعت المصاريف بتاعتهم من غير ما ترفع قضية نفقة لأن ده حق عيالي عليا وعيالي بيزوروني وبديهم مصاريفهم".

رفضت ترجع تاني

وأضاف:"مراتي عندها 48 سنة أقل مني بسنتين ولما أخواتي كلموها عن محاولة الرجوع كانت بترفض وكانت بتطلعني إنسان وحش قدامهم وأخواتي استغربوا وقالولها أنتي بتتكلمي عن إنسان منعرفوش ده كان بيصرف علينا وقالت عليا مبيصرفش ومبيعملش وأنها اللي جايبه الشقة دي قالولها أنتي ولا ليكي ورث ولا بتشتغلي عشان تجيبي شقة زي دي ده  هو باع أرضه وباع ورثه وباع عربيتين عشان يصرف عليكوا إزاي تقولي كلام زي ده".

مراتي غدرت بيا

وقال الزوج:" هي ست خلاص غدرت بيا بعد ما كانت عايشة في نعيم وعايشة كويس جات ظروفي بقت وحشه خلاص تخلعني إزاي آمن ليها بعد كده، وإزاي واحده باعتني وعاوزه تخلعني وبتقول عليا ما كلام مش فيا فحسبي الله ونعم الوكيل".

عايز حقي

وأوضح الحاج محمد:" أنا عاوز حقي وعاوز عيالي وعاوز شقتي هي عايزة تتطلق ممكن أشوفلها مكان تقعد فيه هي والعيال وهديهم مصاريفهم وشقتي اللي أنا صرفت عليها دمي وتعبي فيها علشان اشتريها، وأنا ممكن ابيعلها الشقة واجيبلها شقة تانية وأنا مش بقول مش هجيبلها شقة بس أجيبلها شقة علي قدها وحتي عيالها اللي من طليقها بقالهم 18 سنة قاعدين معايا وولادها بعد ما ربيتهم وكبروا مسألوش عليا حتي كنت ببعتلهم عشان أشوفهم محدش سأل وهي سليطة وسيطرت علي العيال وكان ليها حاجات حلوه معايا وطول ما هي عايشة كويس كانت كويسة، وعلى الراجل ميأمنش لأي ست لأن النفوس بتتغير في وقت المحنة".

وقال:"أنا بقولها اتقي ربنا وأنا هشتكي لربنا ولأني مظلمتهاش كنت في الأول ممكن اغلط فيها وأمد إيدي عليها لأن هي كانت بتعمل حاجات تخليني أمد إيدي عليها زي إنها ممكن تنزل من غير ما تقولي ممكن تعمل تصرفات أنا مش عاوزها وكل دي مشاكل أسرية".

واختتم:" أنا مريت بصعوبات عمري ما مريت بيها قبل كده يعني الحالة المرضية تعباني والحاله العملية مفيش خالص كل الشركات وقفت خالص وأنا عايش لوحدي مفيش حد معايا خالص وأنا عملت اللي ربنا قدرني عليه ومستاهلش كل ده، وأنا كل اللىي عاوزه أشوف عيالي ويقعدوا معايا ومش عاوز غير الستر والصحة".

تابع موقع تحيا مصر علي