اتفاجئت بالمركز الأول.. الأولى على الشعبة الأدبية: «كنت بذاكر 9 ساعات ومكنش هدفي كلية عالية»

حرص موقع تحيا مصر على لقاء الطالبة زينب أكرم حسن، الأولى على الثانوية العامة في الشعبة الأدبية، بمجموع 387 من محافظة الفيوم، مدرسة الشهيد عبد الرحمن علي البشيهي (أم المؤمنين ثانوية بنات سابق)؛ لتهنئتها والتحدث معها حول تفوقها ونصائحها للأجيال القادمة من طلاب الثانوية العامة.

الثالث على الثانوية العامة: بنصح كل طالب يخوض تجربته الخاصة.. وسعيد بالنظام الجديد في التعليم

تحيا مصر ينشر أسماء أوائل الثانوية العامة «علمي علوم»

الأولى على الشعبة الأدبية: بذاكر 9 ساعات

وأكدت زينب أنها لم تكن تعتمد عدد ساعات محدد وثابت للدراسة، قائلة: «حسب أوقات الدروس، لو درس واحد في اليوم كان ممكن أذاكر 8 أو 9 ساعات، لو يوم فيه دروس كتير أكيد مكنتش بذاكر كتير».

وعن حياتها خلال فترة الثانوية العامة، أوضحت أنها كانت تستمع بحياتها مثل أي شخص آخر، قائلة: «كنت بخرج مع صحابي بس مش كتير وبنتكلم كتير لو متابعة برنامج بشوفه، أوقات بقرأ، الفكرة إنك تاخد الموضوع إنها سنة عادية بس عايزة جهد شوية».

كما وجهت الشكر لأسرتها على دعمهم لها خلال تلك الفترة، قائلة: «أهلي كانوا بيدعموني جدًا وطبعا المدرسين كانوا بيحسسوا الواحد إن الدنيا بسيطة، وده ساعد كتير»، مضيفة: «مامتي كانت الأولى على المحافظة في الثانوية العامة، وبتحب التعليم وكانت موفرالي جو أنه مفيش غير مذاكرة ومعملش أي حاجة تانية».

وأضافت: «أنا كنت علمي في البداية وحولت، حسيت إن المواد مفيهاش روح، كنت حابة أدرس حاجة أبحث فيها أكتر، وناوية أدخل حقوق أو ألسن إن شاء الله وأتمنى أحافظ على المركز الاول في الجامعة».

لو قاعد مركز هتعرف تنجز

ووجهت نصيحة لطلاب الثانوية العامة في السنين المقبلة قائلة: «لو قاعد مركز هتعرف تنجز، لو متوتر وقلقان مش هتستفاد، الحبسة مش هتفيد، فيه فترات الواحد كان بيطلع عينه أكيد وأوقات تانية بيتراخى، بس المهم تنظم وقتك وتركز».

اتفاجئت بالمركز الأول

وأوضحت الأولى على الشعبة الأدبية، أنها تفاجئت بحصولها على المركز الأول، قائلة: «مكنتش حاطة المركز الأول هدف ليا، لأني مكنتش حاطة كلية عالية أوي هدف ليا زي سياسة أو إعلام، أنا بس كنت عايزة أجيب مجموع عالي واتفاجئت بالمركز الأول»

نتيجة الثانوية العامة 2022

اعتمد الدكتور طارق شوقي وزير التربية والتعليم والتعليم الفني، أمس الجمعة، نتيجة الثانوية العامة 2022، والتي سيتم إتاحتها لطلاب الثانوية العامة على موقع الوزارة في تمام الساعة السادسة مساءً، عبر اتباع الخطوات التالية: 

- الدخول على رابط الوزارة الرسمي لمعرفة نتيجة الثانوية العامة من هــنــا 

- كتابة رقم الجلوس الخاص بطالب الثانوية العامة.

- اختيار إظهار النتيجة، والتي ستظهر فور اعتمادها رسميا بالدرجات وليس بالنسبة المئوية.