علاقتي ببناتي علاقة صداقة ونفسي نعمل مهرجانات سينمائية بدون مجاملة.. أبرز تصريحات هشام ماجد في برنامج "أسرار النجوم"

حل الفنان هشام ماجد اليوم الخميس الموافق 25 من شهر أغسطس ضيفًا في برنامج “أسرار النجوم” الذي تقدمه الإعلامية إنجي علي ويذاع على محطة راديو “نجوم إف إم” كل يوم خميس من الساعة الثامنة مساءً وحتى العاشرة على الهواء.

تحيا مصر يرصد أبرز تصريحات هشام ماجد في برنامج “أسرار النجوم”

وأثناء الحلقة تحدث الفنان هشام ماجد عن الكثير من الأمور التي تخص حياته الشخصية والمهنية، وإليكم أبرز تصريحاته في الحلقة:

أبرز تصريحات هشام ماجد 

ـ نفسي نعمل مهرجان فيه جوائز حقيقة ومفهوش مجاملات، وفي مرة مهرجان كلمني عشان يديني جايزة ولما مروحتش ادوها لممثل تاني

ـ تجسيد أعمال السيرة الذاتية صعب أوي، وأتمنى تجسيد سيرة سمير غانم

ـ وبحترم اللي بيقدم أعمال السير الذاتية بشكل حلو، زي أيام السادات للراحل أحمد زكي، وكان فيه مسلسل عن تحية كاريوكا، وعن إسماعيل ياسين اللي قدمه الفنان أشرف عبدالباقي

ـ السؤال الدايم عن علاقتي بأحمد فهمي وشيكو مالوش معنى، وملوش غير إجابة واحدة، أنا بحب أحمد فهمي جدًا فهل لو أنا بكرهه هل هخرج للإعلام وأقول دا لأ، وأنا طبعا مش بكرهه

ـ دلال عبد العزيز ست عظيمة وسابت فراغ فني وإنساني كبير، وكانت أكتر فنانة تزور الناس وتسأل عليهم وتودهم وموجودة في أي عزا

ـ وهي انبسطت جدًا لما عرفت أنها هتقدم مشاهد أكشن في (تسليم أهالي)

ـ دنيا سمير غانم عفريتة تمثيل وأقوى ممثلات جيلها، ومن أكتر الفنانات اللي بمثل قدامها وأسأل بتعمل كده إزاي فهي بتتحول تماما أمام الكاميرا

ـ وصوتها رائع وبتقدم أغاني مميزة وملتزمة جدا في الشغل وبتحب تذاكر كتير، وبتعمل بروفات كتيرة ولطيفة جدا في اللوكيشن وكل الناس بتحبها، وإن شاء الله نكرر تجربة العمل مع بعض

ـ شغالين على مسلسل "اللعبة 4"، ولما نحس اننا معندناش أفكار جديدة نقدمها مش هنعمل أجزاء تانية، وفي الجزء الرابع حسينا أن القماشة تسمح إن يكون فيه جزء خامس أو ممكن يكون آخر جزء، لسه مش عارفين

ـ أنا عندي بنتين (كارما) و(نادية) وبحاول أبقى صاحبهم وأتفادى أكون والدهم، لأن علاقة الأب بيكون فيها مسافة وأنا عايز أكون قريب منهم على قد ما أقدر، وإحنا مش في زمن المنع والرفض والزعيق ودا هيودي إلى أن تتعمل كل حاجة من وراك فلازم تصاحبهم وتقرب منهم ويحكوا لك عن حياتهم وهم مطمنيين