عاجل
الجمعة 29 مارس 2024 الموافق 19 رمضان 1445
رئيس التحرير
عمرو الديب

رغد أمام محكمة الأسرة: جوزي عرض عليا مليون جنية عشان أوافق علي جوازته التانية ومحرمهوش من العيال

رغد أمام محكمة الأسرة
رغد أمام محكمة الأسرة - ارشيفية

"جوزي عينه فارغة وعايز يتجوز عليا رغم أني معيشاه في الجنة ".. بتلك الكلمات روت رغد عن المليون جنية التي أعطاها لها زوجها مقابل أن توافق علي أن يكون لها ضره وأن تترك أطفالها لحضن أبيهم، ولكن غيرة قلبها ساقتها إلي الرفض .

مكنتش حارماه من حاجة 

بدأت رغد حديثها لتحيا مصر :" أنا وجوزي عندنا 5 أطفال 3 أولاد وبنتين، حياتنا مع بعض كانت الناس كلها بتحسدنا عليها كنت مدلعاه ومهنياه وبنفذله كل طلباته من قبل ما يطلبها ده غير اهتمامي ببيتي وبأولادي وبدراستهم  و أهتمامي كمان بشكلي وبلبسي لدرجة أنه كان دايما يقولي " أنا مش هحتاج اتجوز عليكي يا رغد لأن أنتي بمثابة كل الستات اللي ممكن تشوفها عيني ودايما بشوف معاكي الجديد ".

دخل عليا بضرة ومعاه مليون جنيه  

وتابعت :"  في مرة كنت قاعدة بذاكر لعيالي ولقيت جوزي دخل من باب الشقة ومعاه واحدة وشنطة فلوس وقالي تعالي يا رغد عايزك في كلمتين بعيد عن الأولاد قعدنا وأتكلمنا ووقالي أنه قرر يتجوز تاني وأن شرع ربنا محلله ده وأنه في نفس الوقت باقي عليا ومش عايز يخسرني ولا يخسر أولاده ، وهو عشان مستريح ماديا جدا في شغله طلعلي مليون جنيه وقالي " دول كلهم ليكي أنتي والأولاد خديهم وهني نفسك بيهم وأوعديني أنك مش هتحرميني من عيالي عشان أنا عارفك عندية ودماغك ناشفة ".

لعبته فشلت وقررت أخلعه

وأختتمت :" جوزي كان فاكرني ست مادية هوافق علي الفلوس وأنسي غيرتي ومشاعري رميتله الفلوس وخدت عيالي ولمينا هدومنا ورجعت علي بيت أهلي وقولتله " أتهني بعروستك وبالشقة كمان ومبروك عليكم "قررت أخلعه عشان الراجل اللي زي ده ميستاهلش واحدة زيي كانت قايداله صوابعها العشرة شمع يمكن كنت هوافق علي جوازته التانية لو كنت حارماه من حاجة لكن انا عمري ما قصرت وعوضي عند ربنا ".

تابع موقع تحيا مصر علي