عاجل
الجمعة 29 مارس 2024 الموافق 19 رمضان 1445
رئيس التحرير
عمرو الديب

مأساة أميرة : «جوزي دكتور و بيحاسبني علي الكشف في عيادتة زي الناس الغريبة»

محكمة الاسرة
محكمة الاسرة

" جوزي مش بيرضي يقول لحد من اللي شغالين معاه في العيادة أني مراته عشان ياخد مني فلوس الكشف" بتلك الكلمات روت أميرة لـ تحيا مصر من أمام محكمة الأسرة عن زوجها الذي يعاملها معاملة الغرباء في مكان عمله مما سبب لها الأحراج والنفور منه .

جوزي دكتور باطنة شاطر 


بدأت أميرة حديثها لتحيا مصر :" جوزي دكتور باطنة شاطر وبيحب شغله جدا وبالرغم من أنه بيكسب كتير جدا في اليوم إلا أنه بخيل جدا معايا ومع اولاده الأتنين أحنا متجوزين بقالنا 4 سنين وعندنا ولد وبنت تؤام الناس كلها بتحسدني عليه وبيقولولي " يا بختك جوزك شاطر وبيكسب وأكيد مهنيكي أنتي وأولادك ومعيشكم أحسن عيشة ده عليه زحمة في العيادة طول الوقت وأكيد بيطلعله بألوفات في يوم واحد وميعرفوش اللي فيها وأن الفلوس اللي هو بيكسبها دي أحنا مبنشوفهاش " .

جوزي أحرج والدتي في عيادته وحاسبها علي تمن الكشف وهي علي قد حالها 


وتابعت :" في يوم والدتي جالها ألم في معدتها وطبعا عشان عارفة ان جوز بنتها دكتور راحتله العيادة علي أساس أنه هيجاملها وميحاسبهاش علي تمن الكشف أنا أهلي ناس غلابة وعلي قد حالهم ووالدتي متعرفش العذاب اللي جوزي معيشني فيه ولا هي ولا أي حد من أهلي وبالفعل راحتله العيادة لوحدها وبعد ما كشفت وخلصت جت تمشي راحت السكرتيرة بتاعته ندهتلها وطلبت منها تدفع تمن الكشف والدتي  قالتلها " انا حماة الدكتور" لكن البنت قالتلها أن الدكتور هو اللي مأكد عليها أن حتي لو حد من أهله ميمشيش غير لما يدفع والدتي دفعت وكانت مصدومة من الموقف اللي هي أتعرضتله ده ولما أتصلت بيا وحكيتلي مكنتش عارفة أقولها أية وأضطريت أكشفلها عن طبع جوزي وأنه وهو في الشغل مبيهموش حد وأنه بخيل جدا معايا ومع أولاده ودي حاجة زعلت مني والدتي جدا أني مكنتش حكيالها كل ده ومخبية عليها ".

جوزي بيقولي الشغل شغل ولو معكيش فلوس متجيليش العيادة 

 
وأختتمت :" بعد الموقف اللي حصل مع والدتي جيت اواجه جوزي أنه أزاي يعمل معاها كدة وهو عارف انها ممكن تبقي عشمانة فيه و معهاش فلوس لكن لقيته بيقولي " مفيش عشم في الشغل أنا متعبتش كل ده عشان في الأخر أشتغل ببلاش " سكت وأتوجعت جدا من كلامه والأيام عدت لحد ما عيالي كلوا حاجة تعبتلهم معدتهم جدا وروحت بيهم لجوزي العيادة عشان يلحقهم كشف عليهم وكتبلهم علي علاج ونفس الموقف اللي حصل مع والدتي حصل معايا أنا كمان بعتلي السكرتيرة بتاعته عشان تحاسبني علي الكشف وأنا كنت فاكرة أنه حتي لو عمل كدة مع والدتي يمكن معايا أنا وولادي يغير طريقته وتفكيره لكن اللي حصل عكس كدة دفعتلها تمن الكشف رغم أنه كان غالي وهو مش بيدينا غير فلوس قليلة ولما روحنا البيت أنا وهو  سألته " أنت لحد هتفضل كدة تحرجني قدام الناس وتعاملني معاملة الغرب " راح قالي " الشغل الشغل ولو معكيش فلوس متجيليش العيادة أبقي أدفعي تمن الكشف بتاعي من مصروف البيت عادي مش هيجرالك حاجة " ومن يومها وأنا قررت أرفع عليه دعوي خلع عشان مبقيتش حاسة أني عايشة مع راجل بيتكفل بيا بالشكل المطلوب لا بيدفعني انا واهلي ومش عامل حساب لأي صلة بتربطنا بيه وخلاص تعبت منه ".

تابع موقع تحيا مصر علي