زوج داخل محكمة الأسرة : مراتي أشترت بدلة رقص وراحت رقصت بيها لولاد عمها في بيتي

" جمعت قرايبها وانا مسافر ورقصتلهم " ... بتلك الكلمات روي زوج داخل محكمة الأسرة عن زوجته التي أستغلت سفره ورقصت بملابس مغرية أمام أقاربها الرجال مما أثار الغضب لدي زوجها وقرارالأنفصال عنها.

تحيا مصر 

مراتي طايشة بس بحبها وكنت بعلمها الصلاة 

قال الزوج فى مستهل حديثه مع تحيا مصر :" أتجوزت مراتي وهي صغيرة في السن وعندها 18 سنة هي من أسكندرية وانا راجل صعيدي من سوهاج وجينا عيشنا في القاهرة وأنا عارف أني واخدها في سن مراهقة وطيش بس بحبها وبتحبني ووعدتني أنها تلتزم وتبدأ تصلي وتتحجب كمان لأنها مكنتش محجبة وتبعد شوية عن النت وتتعلم أزاي تبقي ست بيت وأنا كنت معاها واحدة بواحدة ومطول بالي عليها وعندي أيمان كبير أنها هتكون زوجة مثالية وأم شاطرة ".

بعد الجواز كنت بلاحظ أنها بتحب الرقص 

وتابع :" بعد الجواز كنت بلاحظ أن مراتي بتحب تتفرج علي فيديوهات رقص كتير لراقصات مصرية وأجنبية ونفسها تبقي زيهم وبتقولي " دي موهبة وفيها أيه يعني ؟" كنت بشد معاها في كل مرة تقولي كدة وأفهمها أنه عيب تقول حاجة زي كدة لأنها بقيت خلاص واحدة متجوزة ولابسة الحجاب ولازم تحافظ علي شكلها وشكل جوزها وقولتلها أن الرقص مسموح بيه  في حالة واحدة بس وهي أنها ترقصلي أنا بس واحنا مع بعض ولوحدينا ومحدش تاني يشوفها وهي وافقت ولقيتها في يوم بتفاجأني أنها أشترت " بدلة رقص " وقالتلي أنها جايباهم عشاني أنا وقولتها " لو حد غيري شافك لابساهم حتي لو امك هطلقك فيها " .

كنت مسافر ورجعت فجأة لقيتها بترقص لولاد عمها

وأختتم :" كنت مسافر بقضي مصلحة شغل عندي في البلد في سوهاج وكنت هرجع بعد أسبوع بس وأنا هناك عرفت أني هرجع تاني يوم بليل وقولت أعملها مفاجأة لمراتي وأول ما دخلت من باب الشقة لقيت صوت أغاني عالي وأهل مراتي كلهم موجودين وعاملين عيد ميلاد أخوها في بيتي وهي واقفة وسطهم ببدلة الرقص وبترقصلهم وولاد عمها الرجالة كانت عزماهم وقاعدين بيطبلولها شوفت المنظر ده ووقفت مش عارف أتحرك ولا أنطق وهي لما شافتني دخلت أوضتها جري وانا دخلت وراها أديتلها علقة وطلقتها قدام أهلها كلهم عشان الست اللي تعمل كدة من ورا جوزها وتستغل سفره وتكشف جسمها للناس حتي لو قرايبها تبقي ست مش كويسة ومينفعش تبقي أم ولا حتي زوجة "