هيثم شاكر: أدين بالفضل لـ فايز عزيز بعد والدتي وأغنية احلف بالله وش السعد عليا

كشف الفنان هيثم شاكر عن بدايته الفنية وحبه للمزيكا مُنذ الصغر، كما تحدث عن أول الأعمال الفنية التي طرحت له.

تحيا مصر يرصد لكم تصريحات الفنان هيثم شاكر

وقال هيثم أثناء استضافته في برنامج أنغام الذي تقدمه الفنانة أنغام عبر قناة دي أم سي: حبيت المزيكا من غير ما أعرف، وأنا صغير كنت مغترب في دولة السعودية وكانت القناة الأولى والفضائية شغالين في البيت عندنا على طول.
 وتابع: كانت الأغاني بتاعت الأفلام شغالة على طول وطول الوقت كنت بتابع الافلام والاغاني وبغني معاها ومش مدرك أن صوتي حلو وفي المدرسة كانوا بيخلوني اطلع اقول النشيد وفي حصص الدين كنت برتل القرآن وكنت فاكر أن هما بيعملوا كده عشان أنا شاطر.

وأضاف: وبعدين اكتشفت ان في حاجه وبدات اجيب شرايط الكاست واسجل عليها صوتي و كانت في فترة التسعينات ولما كان في حد جاي من مصر اجازة كان بيجبلنا شرايط من مصر وكنت بسمعهم واسجلهم وكانت الموهبة موجودة.

واستكمل: ابويا كان بيحب يسمع كارم محمود وكان مقتنع أن صوته حلو هو بيأدي حلو وانا كنت بحاول أقلده لغاية مااكتشفت ان صوتي حلو ولما حد يجي كانوا في البيت يقولوله هيثم صوته حلو ويلا سمع عمو.

وتابع: وبدأت في ابتدائي احلم إني أكون مغني و كانت في بداية ظهور مصطفى قمر وإيهاب توفيق وبوجه ليهم تحيه وكلهم اصدقائي حاليًا.

وكشف: ونزلت مصر عشان أكمل دراستي والحلم كان في دماغي ودخلت الجامعه وأتعرفت على شلة اللي غاويين مزيكا وصاحبي قالي أن في شركة إنتاج فتحت جنب البيت عندي وعايزين ناس وخد رقمهم وكلمهم.

واستطرد: لما كلمتهم قالولي تعالى وفايز عزيز سمع صوتي وهو مش بيبين غي ريأكشن وفضل ساكت لغاية ما خلصت وقالي هنكلمك وانا اضايقت جدا وقولت اكيد انا منفعش لان رد الفعل كان هيبقى مختلف .
واضاف: أول ما رجعت البيت كلموني قالولي انت معانا وهنعمل البوم جديد وفي حميد الشاعري وحكيم واللي اغنيته هتنجح هنعمل الالبوم بتاعه وهنصورله وبدانا نعمل ورشة ونختار اغاني.

وتابع: سعادتي كانت لا توصف بأن اول اغنية اعمها مع حميد الشاعري وهي احلف بالله وكانت توزيع حميد وكلمات رحيم.
واستكمل: وكنت مضايق أن الأغنية بتاعتي دراما وكانت نازلة في موسم الصيف وقولت الأغنية دي هتفشل ولكن أستاذ فايز عزيز قالي بكرة تشوف الأغنية دي هتعمل إيه.

هيثم شاكر: أدين بالفضل لـ فايز عزيز لأنه السبب في نجاحي

وقال: بدين للفضل لربنا وامي ثم فايز عزيز لأنه السبب غني انجح واكمل وكان يؤمن بموهبتي جدًا.

هيثم شاكر: أغنية احلف بالله وش السعد عليا

وكشف هيثم أن أغنية أحلف بالله هي البداية له وبداية معرفة الجمهور به، موضحًا انها تعتبر وش السعد عليه.