عاجل
الجمعة 29 مارس 2024 الموافق 19 رمضان 1445
رئيس التحرير
عمرو الديب

عمر خورشيد: بغسل لمراتي المواعين وكنت بحبها من طرف واحد

عمر خورشيد
عمر خورشيد

كشف الفنان عمر خورشيد عن رأيه في تريند “المرأة مش ملزمة”، الذي انتشر في الفترة الأخيرة، وجدل مساعدة الزوج للزوجة.

عمر خورشيد: بغسل المواعين لمراتي وكنت برضع بنتي

فقال عمر خورشيد خلال لقائه بموقع تحيا مصر: “أنا بغسل المواعين وبروق البيت وبقعد ببنتي وبغيرلها هدومها عشان مراتي مبتعرفش وبرضع بنتي لمدة 6 شهور، ومفيش حاجة اسمها ملزمة ومش ملزمة الموضوع بالتراضي، لو قابل تجيب لمراتك خدامة جبلها مش قادر اقعد معاها وقولها انها تشيل معاك يا كل واحد من طريق”.

وتابع: التفاهم هو اللي باقي في العلاقة الزوجية لا حب باقي ولا حاجة باقية، فين الحب لو احنا كل يوم بنتخانق مع بعض ومش متافهين على حاجة.

عمر خورشيد: متجوز عن قصة حب من طرف واحد وكتبت الكتاب بدون موافقتها

وتحدث عمر خورشيد عن علاقته بزوجته ياسمين الجيلاني، فقال: متجوز عن قصة حب من طرف واحد، أنا خطفتها هي مكنتش موافقة هي فجأة لقت كتب الكتاب كمان أسبوع، أنا صورت معاها مسلسل أشرار وطيبين وكنت طالع خالها شوفتها حبتها ومقولتلهاش وفضلت عايش حياتي لحد ما قولت لازم ألتزم وأتجوز، فبطلت كل الحاجات الصح اللي بعملها  كان من ضمنها الغرور بطلتها قبل الجواز".

عمر خورشيد عن ياسمين الجيلاني: كانت بتحبني بس عاملة عبيطة

وتابع: "كملتها قولتلها انتي فين قالت أنا فرنسا وراجعة بعد شهر واحنا كنا صحاب وهي عارفة كل حاجة عني حتى علاقاتي مع الستات قولتلها عايزة أتقدملك خدته بهزار قالتلي تعالى خالي موجود روحتلها وهي مش فاهمة حاجة وقرينا الفاتحة وقولتلها بعد أسبوع هنكتب الكتاب وكلمتها وكتبنا الكتاب وجبنا الفستان واتجوزنا، هي كانت بتحبني بس عاملة عبيطة".

عمر خورشيد وظاهرة التنمر: مش بتضايق منها عشان اتعودت عليها

وأضاف عمر خورشيد خلال اللقاء موضحا رأيه في ظاهرة التنمر المنتشرة على السوشيال ميديا هذه الأيام، فقال: الفنانين بيزعلوا لما حد بيتنمر عليهم لكن هو مش بفرق معايا اللي هو قول اللي انت عايزه مش بيقرف معايا لكن أنا بزعل لزميلي جدا فممكن أدافع عنه بس مدافعش عن نفسي وميصحش خالص عيب يعني اننا نصب نفسنا اننا نتكلم عليها.
 

تابع موقع تحيا مصر علي