مصطفى قمر: في ثانوي كنت بحلم اكون عبد الحليم حافظ وأبويا دخلني كلية تجارة غصب عني

تحدث الفنان مصطفى قمر عن بدايته الفنية ، كما تحدث عن طفولته، وكشف قمر عن كواليس اغنيته على البحر والتي تعاون فيها مع أيمن بهجت قمر.

تحيا مصر يرصد لكم تصريحات مصطفى قمر

وقال مصطفى قمر خلال استضافته في برنامج أنغام: كنت ساكن في مكان شعبي في المنشية في اسكندرية  وكنت ساكن في بيت عيلة وكانت احاسيس حلوة متتكرش وذكريات كتير.

وتابع: وانا في 4 ابتدائي كان عندي مُدرسة اسمها أم كلثوم قالت مين يحب يعزف على آلة المندولين رفعت ايدي وانا كنت بتكسف بس بدأت اتعلم مندوبين وبابا جابهولي من واحد بتاع روبابكيا، وبعدها اتعلمت جيتار.

وذكر قمر موقف مع والده وقال: بابا قالي على اغنية فيها كلمتين خارجين وأنا صغير كنت بحفظ الكلام  وقالولي في الحضانه قول نشيد وانا افتكرت الاغنية اللي بابا قالها وقولتها في الحضانه وساعتها جابوني وقالولي مين حفظك النشيد ده وجابوا بابا وحصل مشكلة.

وأضاف: أنا عملت نفس الموقف ده مع إياد أبني ومرة كنا في المنتزة في اسكندرية وبنتفرج على قصر الملك فاروق وأنا قولتله ده قصر جدك وراح قال لكل صحابه أن جده الملك فاروق.

مصطفى قمر: علمت أخويا الصغير الجيتار وبيطلع يغني معايا في الحفلات

واستكمل: أنا عندي 4 أخوات وأخويا الصغير علمته جيتار وغنى وعمل ألبوم بس الموضوع ممشيش معاه وسافر أمريكا وحاليًا هو دكتور علاج طبيبعي بس بطلعه معايا على المسرح يغني في حفلاتي في اسكندرية.

مصطفى قمر: كنت بحلم اكون زي عبد الحيلم حافظ

وأضاف: كنت كل يوم في ثانوي ببص في السقف واتخيل اني عبد الحليم حافظ  واعمل أفلام وأغني وكنت بستنى اروح انام عشان اعيش الحلم الجميل ده لغاية ما روحت الجامعة وبدأت مشواري الغنائي.

مصطفى قمر: جبت 76% في ثانوي وأبويا دخلني كلية تجارة غصب عني

وكشف: جبت في ثانوية عامة 76% وكان نفسي أدخل كلية هندسة ومجموعي كان جايب هندسة الزقازيق وابويا صمم أني أدخل كلية تجارة وانا من اول  يوم مش حابب الكلية ودخلت كلية التجارة بالجيتار مش بكشكول المحاضرات من أول يوم  وفي اسكندرية كانت لقطة غريبة أن حد يمشي في الشارع في اسكندرية بالجيتار ويدخل الجامعه بالجيتار

وأضاف: بدأت حكاية الغنا من الجامعة وحبيته وعايز اظهر وأتشهر وبدات التلحين.

وعن أغنية على البحر قال قمر: أغنية على البحر أيمن بهجت قمر جبهالي وطارق مدكور لحنها بشكل كويس جدًا وقعد اسبوعين يفكر يطلعها كويس وهي عايشة بقالها سنين وهتفضل عايشة.