بحب نفسي وأنا ست ومستحيل عمرو دياب يبقى سينجل.. أبرز تصريحات هاني رمزي

فجر الفنان المصري هاني رمزي عدد من التصريحات الجريئة خلال تصريحات تليفزيونية، ويرصدها تحيا مصر خلال السطور التالية:

أبرز تصريحات هاني رمزي

لسه ممثلتش أحسن فيلم ليا

بقدم دور الست في معظم أفلامي لأنها مادة للضحك وأنا بحب الستات وبحب نفسي وأنا ست

ما بين كل فيلم وفيلم ليا وقت كبير بسبب إن مفيش أفلام وهضيع كل اللي عملته لو عملت أي حاجه وأنا بشتغل لمزاجي الفني

ازاي عمرو دياب سينجل لحد دلوقتي تيجي إزاي أنا بحقد على عمرو دياب بسبب كم الستات اللي حواليه

ومستحيل عمرو دياب يبقى سينجل لو سينجل مش هيعرف يغني

أنجح حد في جيلي كريم عبد العزيز ونفسي أجرب قصر محمد هنيدي ولقب نمبر وان ده نسبي

مش بحب مسلسل حكيم روحاني لأن كواليسه مكنتش عجباني وكنت لسه في بداياتي وحتى هذه اللحظة متفرجتش على المسلسل

آخر مشكلة جاتلي كانت في الضرايب في أعمال مخدتش فيها فلوس وعليا فيها ضرايب وبحاول أحل فيها لغاية دلوقتي ولسه متحلتش

معرفش أقيم نفسي كام من عشرة وأنا في الشخصية معدتش واحد من عشرة

هاني رمزي يستعد لتقديم جزء ثاني من غبي منه فيه

على الصعيد الآخر، كشف هاني رمزي على أنه هنا نية لتقديم جزء ثان من فيلم “غبي منه فيه”، ولكن بشرط وجود سيناريو جيد.

وقال هاني رمزي: “مشروع تقديم جزء ثاني من فيلم غبي منه فيه قائم وهيفضل قائم إحنا فكرنا أكتر من مرة بسبب رحيل العظيم حسن حسني والعظيم طلعت زكريا والموضوع اتأجل قبل كده وبقى صعب”.

وأضاف: “لكن هو قائم لغاية دلوقتي وأعتقد إن إحنا هناخد شخصية سلطان بطل غبي منه فيه في أحداث جديدة زي الأفلام الأجنبي ما بتعمل ولو اتكتب سيناريو لغبي منه فيه 2 حلو أوي أنا من تاني يوم هبدأ تصوير”.

عادل امام يدعم هاني رمزي 

وتابع الفنان هاني رمزي في مداخلة هاتفية له ببرنامج "مساء dmc" عبر شاشة قناة dmc الفضائية، أنه على تواصل دائم بالفنان الكبير عادل إمام.

وأوضح أنه يشجعه أيضًا لتقديم جزء ثاني من فيلم "غبي منه فيه"، قائلًا: “إحنا متواصلين علطول مع الزعيم عادل إمام، وبيحاول معانا نعمل الجزء الثاني من الفيلم”.

واستطرد قائلًا: "وإحنا حاطين الموضوع في اعتبارنا، لكن اللي موقفنا السيناريو والكتابة، وعملنا كذا محاولة لكن كل مرة نحس إن الفيلم الأول أفضل".