زوج علا غانم لـ تحيا مصر: أمها السبب.. وعمرها ما مدت ايدها عليا

كشف الأستاذ عبد العزيز زوج علا غانم عن بعض التفاصيل بشأن خلافه مع الفنانة واستغاثتها للدولة أمس، وذلك خلال بث مباشر بموقع تحيا مصر. 

زوج علا غانم: امها السبب 

وقال زوج علا غانم لـ تحيا مصر: علا مش مصابة خالص وازاي انا هضرب حد وايدي بتنزل دم، وانا معنديش ومعرفش حد اجيبه، وامها قالتلها تعمل كده. 

زوج علا غانم: عمرها ما مدت ايديها عليا.. عشان كده قولت بتتعاطى

وتابع الأستاذ عبد العزيز: عندها بنتين كاميليا وفريدة ومتجوزين، وهي بتتعاطى من الشهرين تلاتة دول وعمرها ما مدت ايدها عليا عشان كده بقول انها بتتعاطى.

علا غانم: دخلوا عليا بلطجية كانوا هيموتوني وكله بسبب زوجي

وكانت قد خرجت الفنانة علا غانم لتكشف تفاصيل واقعة تعدي زوجها عليها رفقة بعد الأشخاص الأخرين لـ الاستيلاء على جزء من منزلها، وذلك خلال مداخلة هاتفية مع الإعلامي عمرو أديب في برنامج الحكاية.

روت علا غانم تفاصيل الأزمة التي تعرضت لها على يد زوجها عبد العزيز لبيب من البداية، فقالت: يوم الجمعة بعد الصلاة لقيت أحد الغفراء بيقولي انه فيه ناس جاية وكانت عربيات عليها ناس كتير وبيقول ان اللي جايين بيقولو انهم تبعي، وأنا ما أعرفش ولا واحد فيهم.

وتابعت علا غانم حديثها: كانوا بيحاولو يقتحموا البوابة عشان يدخلوا الناس و20 بني أدم رجالة وستات كانو كتير جدا، وكل أما أدخل مع حد بيضربوني ويكتموني، وضربوا الغفرا بتوعي بالشوم، وأمي اعتدوا عليها.

وأضافت: الست كانت حاطة وشي في صدرها عشان مطلعش صوت وأما واحد حس إني قربت أموت قالولها كفايا كدة، وكانوا بيمسكوني من الروب ويرموني على الأرض.

علا غانم: زوجي قال إن أنا اللي نطيت من على السور واقتحمت البيت اللي هو بتاعي

وأضافت: أما روحنا القسم زوجي قال إن البيت بتاعه وهي اللي نطيت من السور واقتحمته، والبيت بتاعي أنا من زمان من قبل ما اتجوزه، وقالولي في القسم يا تتصاحلي وتخليه يعيش في نص البيت يا إما هتفضلي معنا إنتي ومامتك في القسم وأنا رفضت.

وتابعت: كان مستنيني في بيتي وأول ما عرف إني جاية قعد يقول متضربوش عليها نار كان فاكرني جاية لوحدي وضرب الغفرا بتوعي كلهم.

واختتمت علا غانم حديثها، قائلة: جوزي قاعد في بيتي دلوقتي مع الناس اللي رموا عليا مولتوف.