عمرو أديب عن منى زكي: محترمة وعمرنا ما سمعنا عنها حاجة وحشة.. وكارهين يشوفوها محجبة

أعرب الإعلامي عمرو أديب عن استيائه من الهجوم على الفنانة منى زكي بمجرد طرحها البوستر الرسمي لـ مسلسلها الدرامي “تحت الوصاية”، والتي من المقرر أن تشارك به في سباق شهر رمضان 2023.

تحيا مصر يرصد في ذلك التقرير تصريحات عمرو أديب عن الهجوم على منى زكي

عمرو أديب: الهجوم على منى زكي غير طبيعي وأكيد ده وراه حاجة

قال عمرو أديب خلال برنامج الحكاية المذاع على قناة mbc مصر: "منى زكي طالعة في الأفيش محجبة ومفيش أي حاجة فيه تضايق وتلاقي الهجوم غير طبيعي، وبيعلقوا على حواجبها، ووشها وقهرها وحاجات غريبة".

وتابع حديثه: أنا فاهم ده وراه إيه ووراها حكاية قديمة، منى زكي ست محترمة وده شيء منختلفش عليه ومتجوزة راجل محترم عمرنا مسمعنا عليهم حاجة وحشة.

عمرو أديب: الحجاب فرض.. بس لو عملنا مسلسل فيه واحدة محجبة شريرة اي المشكلة!

وأضاف: احنا مش هنتكلم عن المحجبة حلوة ولا وحشة النهاردة هما زي كل البشر فيه منهم الحلو والوحش، ومتأكد إن الحجاب فرض بسل لو عملنا مسلسل فيه واحدة محجبة شريرة اي المشكلة، هو مفيش فيهم شرير خالص!.

واستكمل دلوقتي كل مجموعة من أصحاب الريات يطلعوا يهاجموا طيب وبعدين هنعمل دراما ايه؟ المسلسل اللي هنعمل هيكون ايه اذا كان كل شئ عليه علامة حمرة محدش يقرب من الشيوخ والمحجابات والريف ورجال الأعمال، وغيرهم مع إن كل يوم في المجتمع المصري بنشوف سلبيات عادي.

عمرو أديب: منى زكي نموذج محترم

وأشاد عمرو أديب بـ منى زكي، فقال: منى زكي نموذج محترم إي الثورة اللي حاصلة دي اتفرج على أول حلقة واطلق المدفعجية بتاعتك زي مانت عايز، إمال لو كانت لابسة حاجة تانية كنتوا عملتوا ايه، كل عمل نعمله تطلعوا تهجموه إمال المفروض هنعمل دراما ايه؟ بشويش شوية وخلونا ناخد نفسنا واتفرج على أول حلقة واطلق المدفعجية بتاعتك زي مانت عايز.

واختتم عمرو أديب حديثه عن الهجوم على بوستر مسلسل تحت الوصاية، فقال: ده ترصد واستقصاد وتوحش ومستخسرين تشوفوها بالحجاب وانتوا عارفين انتو بتعملوه ليه وعشان ايه.